कोरेगाव-भीमा हिंसाचार; मिलिंद एकबोटेंना 19 मार्चपर्यंत पोलीस कोठडी

जय महाराष्ट्र न्यूज, पुणे

कोरेगाव-भीमा हिंसाचाराला चिथावणी दिल्याच्या आरोपाखाली अटकेत असलेल्या मिलिंद एकबोटे यांना पुणे सत्र न्यायालयाने 19 मार्चपर्यंत पोलीस कोठडी सुनावली आहे. सर्वोच्च न्यायालयाने काल त्यांचा जामीन अर्ज फेटाळल्यानंतर पुणे ग्रामीण पोलिसांनी त्यांना अटक केली होती. कोरेगाव-भीमा येथे 1 जानेवारी रोजी शौर्यस्तंभाला अभिवादन करण्यासाठी गेलेल्या अनुयायांवर हल्ला करण्यास चिथावणी दिल्याचा आरोप एकबोटेंवर ठेवण्यात आला आहे. अटकपूर्व जामिनासाठी एकबोटे यांनी सर्वोच्च न्यायालयात धाव घेतली होती. मात्र, तपासात सहकार्य करत नसून चौकशीदरम्यान जाणीवपूर्वक चुकीची आणि अर्धवट माहिती देत आहेत. त्यामुळे त्यांची पोलीस कोठडीतील चौकशी अपरिहार्य आहे, असे सांगत राज्य सरकारने त्यांच्या अटकपूर्व जामीन अर्जाला विरोध केला होता. एकबोटेंच्या अर्जावर काल सर्वोच्च न्यायालयात सुनावणी झाली होती. न्यायालयाने त्यांचा अटकपूर्व जामीन अर्ज फेटाळला. त्यानंतर पुणे ग्रामीण पोलिसांनी एकबोटेंना अटक केली होती. पोलिसांनी गुरुवारी त्यांना पुणे सत्र न्यायालयात हजर केले. त्यांनंतर एकबोटेंना 19 मार्चपर्यंत पोलीस कोठडी सुनावण्यात आली आहे.