Disha Salian Case: दिशा सालियन मृत्यू प्रकरणाला 6 वर्षांनी नवं वळण; CBI ने दाखल केली FIR, मृत्यूमागचं गूढ उलगडणार?

मुंबईतील दिशा सालियन मृत्यू प्रकरणाने तब्बल सहा वर्षांनंतर पुन्हा एकदा मोठं वळण घेतलं आहे. दिशा सालियन यांच्या मृत्यूची चौकशी आता केंद्रीय अन्वेषण विभाग म्हणजेच CBI करणार असून, सोमवारी या प्रकरणात FIR दाखल करण्यात आली आहे. बॉम्बे हायकोर्टाच्या आदेशानंतर CBI ने तपासाची अधिकृत सुरुवात केली आहे. त्यामुळे 2020 पासून चर्चेत असलेल्या या प्रकरणातील अनेक प्रश्नांची उत्तरं आता तपासातून समोर येणार का, याकडे सर्वांचं लक्ष लागलं आहे.

दिशा सालियन या अभिनेता सुशांत सिंह राजपूत यांच्या माजी मॅनेजर होत्या. 8 जून 2020 रोजी मुंबईतील मालाड परिसरातील एका उंच इमारतीवरून पडून त्यांचा मृत्यू झाला होता. त्यावेळी मुंबई पोलिसांनी हा प्रकार अपघाती मृत्यू म्हणून नोंदवला होता. मात्र, कालांतराने दिशांच्या मृत्यूच्या परिस्थितीवर आणि तपासाच्या पद्धतीवर अनेक प्रश्न उपस्थित करण्यात आले.

या प्रकरणात दिशा सालियन यांच्या कुटुंबीयांकडूनही संशय व्यक्त करण्यात आला होता. त्यानंतर प्रकरणाच्या स्वतंत्र आणि केंद्रीय तपासाची मागणी करण्यात आली. नुकतेच बॉम्बे हायकोर्टाने या प्रकरणाची चौकशी CBI कडे सोपवण्याचे निर्देश दिले. तसेच सहा वर्षांचा कालावधी उलटूनही FIR दाखल न झाल्याबद्दल न्यायालयाने मुंबई पोलिसांच्या तपासावर प्रश्न उपस्थित केले होते. न्यायालयाने तपासातून उत्तरं मिळण्याऐवजी आणखी प्रश्न निर्माण होत असल्याचे निरीक्षण नोंदवले होते.

आता CBI ने FIR दाखल केल्यामुळे या प्रकरणातील तपास नव्याने सुरू होणार आहे. घटनाक्रम, उपलब्ध पुरावे, संबंधित व्यक्तींचे जबाब आणि आतापर्यंत झालेल्या तपासातील कागदपत्रांचा अभ्यास केला जाण्याची शक्यता आहे. त्यामुळे गेल्या सहा वर्षांपासून अनुत्तरित असलेल्या प्रश्नांकडे पुन्हा तपास यंत्रणेचे लक्ष जाणार आहे.

दिशा सालियन यांच्या मृत्यूनंतर अवघ्या काही दिवसांनी सुशांत सिंह राजपूत यांचा मृत्यू झाल्याने दोन्ही प्रकरणांबाबत सोशल मीडियावर विविध दावे आणि चर्चा रंगल्या होत्या. मात्र, या दोन्ही घटनांमध्ये नेमका संबंध आहे का, याबाबत कोणताही निष्कर्ष काढण्यापूर्वी अधिकृत तपासाचे निष्कर्ष समोर येणे महत्त्वाचे आहे.

दरम्यान, दिशा सालियन यांचे वडील सतीश सालियन यांनी CBI चौकशीचे स्वागत केले आहे. आपल्या मुलीच्या मृत्यूमागील सत्य समोर यावे आणि तिला न्याय मिळावा, अशी त्यांची भूमिका आहे. त्यांनी तपास अधिकाऱ्यांसमोर आपल्याला माहिती असलेल्या बाबी मांडल्याचेही सांगितले आहे.

आता CBI या प्रकरणात कोणत्या दिशेने तपास पुढे नेते, कोणते पुरावे समोर येतात आणि दिशा सालियन यांच्या मृत्यूबाबत अंतिम निष्कर्ष काय निघतो, हे पाहणं महत्त्वाचं ठरणार आहे. त्यामुळे सहा वर्षांनंतर पुन्हा चर्चेत आलेल्या या प्रकरणाच्या पुढील तपासाकडे सर्वांचं लक्ष लागलं आहे.