Jalgaon: जळगाव हादरलं! पहाटे घराबाहेर पडले अन् धावत्या रेल्वेखाली मृत्यूला कवटाळलं , पती-पत्नीसह 2 चिमुकल्यांचा दुर्दैवी अंत

जळगाव जिल्ह्यातील अमळनेर तालुक्यातील टाकरखेडा गावात अत्यंत दुर्दैवी घटना घडल्याने परिसरात शोककळा पसरली आहे. कौटुंबिक वादाच्या पार्श्वभूमीवर एका दाम्पत्याने आपल्या दोन लहान मुलांसह जीवन संपवल्याची प्राथमिक माहिती समोर आली आहे. या घटनेत पती-पत्नी आणि त्यांच्या दोन मुलांचा मृत्यू झाला असून एकाच कुटुंबातील चौघांचा दुर्दैवी अंत झाल्याने गावकऱ्यांमध्ये हळहळ व्यक्त होत आहे. मिळालेल्या माहितीनुसार, टाकरखेडा येथील सुनील अमृत भिल आणि त्यांची पत्नी पार्वती सुनील भिल हे आपल्या दोन मुलांसह पहाटेच्या सुमारास घरातून बाहेर पडले होते. त्यांच्यासोबत दुसरी इयत्तेत शिक्षण घेणारा सनी आणि अंगणवाडीत जाणारा राज हे दोन्ही लहान मुले होती. त्यानंतर कुटुंबाने रेल्वे मार्गाजवळ टोकाचे पाऊल उचलल्याची प्राथमिक माहिती आहे.

पहाटेच्या सुमारास रेल्वे प्रशासनाला या घटनेची माहिती मिळाली. त्यानंतर संबंधित अधिकाऱ्यांनी तातडीने पोलिसांना कळवले. माहिती मिळताच पोलिसांचे पथक घटनास्थळी दाखल झाले. पोलीस निरीक्षक दत्तात्रय निकम यांच्या मार्गदर्शनाखाली घटनास्थळी पंचनामा करण्याची प्रक्रिया पूर्ण करण्यात आली. एकाच कुटुंबातील चार जणांचा मृत्यू झाल्याने टाकरखेडा गावावर शोककळा पसरली आहे. या घटनेमागील नेमके कारण काय होते, कौटुंबिक वादाचे स्वरूप काय होते आणि या निर्णयापूर्वी काही घटना घडल्या होत्या का, याचा तपास पोलीस करत आहेत. प्राथमिक माहितीनुसार कौटुंबिक वादातून हे टोकाचे पाऊल उचलल्याचे सांगितले जात असले, तरी अधिकृत तपासातूनच घटनेमागील संपूर्ण कारण स्पष्ट होणार आहे.