Heat Wave : सूर्याचा प्रकोप! महाराष्ट्रातील ‘हे’ शहर ठरले जगात सर्वात उष्ण; जाणून घ्या, उष्माघातापासून बचाव करण्याचे उपाय

Akola Hottest City in Maharashtra : विदर्भात उन्हाळ्याची चाहूल लागताच सूर्याने आग ओकायला सुरुवात केली असून, मंगळवारी महाराष्ट्रातील अकोला शहराने जगातील सर्वाधिक उष्ण ठिकाण म्हणून नोंद केली आहे. एल्डराडो वेदरच्या आकडेवारीनुसार, अकोल्यात तापमानाचा पारा 44 डिग्री सेल्सिअसवर पोहोचल्याने हे शहर जागतिक नकाशावर उष्णतेचा मुख्य ‘हॉटस्पॉट’ ठरले आहे. केवळ अकोलाच नव्हे, तर जगातील टॉप 10 उष्ण शहरांच्या यादीत महाराष्ट्रातील तीन ठिकाणांचा समावेश झाला आहे. मे महिना सुरू होण्यापूर्वीच विदर्भातील जनजीवन या तीव्र उष्णतेच्या लाटेमुळे विसकळीत झाले असून नागरिकांना प्रचंड उकाड्याचा सामना करावा लागत आहे.

विदर्भातील जिल्ह्यांची जागतिक स्तरावर नोंद
मंगळवारी विदर्भातील अनेक जिल्ह्यांमध्ये विक्रमी तापमानाची नोंद करण्यात आली. अमरावतीमध्ये 43.8 डिग्री सेल्सिअस तापमानासह हे शहर जगातील तिसऱ्या क्रमांकाचे उष्ण शहर ठरले, तर वर्ध्यामध्ये 43.5 डिग्री सेल्सिअस तापमानाची नोंद होऊन ते सातव्या स्थानी राहिले. विशेष म्हणजे, भारतातील 20 सर्वाधिक उष्ण ठिकाणांच्या यादीत एकट्या विदर्भातील 9 जिल्ह्यांचा समावेश आहे. चंद्रपूर, वाशिम, गडचिरोली आणि यवतमाळ या सर्व ठिकाणी तापमान 42 अंशांच्या पुढे गेल्याने संपूर्ण प्रदेश जणू तापलेल्या तव्यासारखा भासत आहे.

रात्रीही उकाड्यापासून सुटका नाही
विदर्भातील नागरिकांसाठी चिंतेची बाब म्हणजे केवळ दिवसच नाही, तर रात्रीही तापमानात घट होताना दिसत नाहीये. चंद्रपूरमध्ये रात्रीचे किमान तापमान 27.6 डिग्री सेल्सिअस इतके उच्च नोंदवले गेले. सूर्यास्तानंतरही वातावरणातील उष्णता कायम राहत असल्याने नागरिकांना रात्रीच्या वेळीही सुसह्य गारवा मिळत नाहीये. सततच्या उकाड्यामुळे अस्वस्थता वाढली असून, प्रशासनाने दुपारच्या वेळी अत्यावश्यक कामाशिवाय घराबाहेर न पडण्याचे आवाहन केले आहे. हवामान विभागाच्या मते, कमाल तापमान सरासरीपेक्षा 1.3 ते 3.8 डिग्री सेल्सिअसने जास्त राहिले आहे.

हेही वाचा – Wardha Heatwave: वर्ध्यात उष्णतेचा कहर! 43°C तापमानात उष्माघाताने दोघांचा मृत्यू; विदर्भात उष्णतेची लाट तीव्र

नागपूरसह इतर जिल्ह्यांची स्थिती
राज्याची उपराजधानी नागपूरमध्येही उन्हाचा तडाखा जाणवत असून तिथे 42.2 डिग्री सेल्सिअस तापमानाची नोंद झाली आहे. देशातील सर्वाधिक उष्ण शहरांच्या यादीत नागपूर 11 व्या क्रमांकावर आहे. यासोबतच गडचिरोली आणि यवतमाळ येथे प्रत्येकी 42.6 डिग्री सेल्सिअस इतक्या उच्च तापमानाची नोंद झाली आहे. विदर्भात कुठेही पावसाची चिन्हे नसल्याने आणि सोसाट्याचे कोरडे वारे वाहत असल्याने जमिनीतील ओलावा कमी होत आहे. वाढत्या उष्णतेमुळे शेतीकामांवर आणि पशुधनावरही विपरीत परिणाम होण्याची भीती व्यक्त केली जात आहे.

पुढील काही दिवस धोक्याचे: IMD चा इशारा
भारतीय हवामान विभागाने (IMD) दिलेल्या इशाऱ्यानुसार, ही उष्णतेची लाट येत्या काही दिवसांत अधिक तीव्र होणार आहे. 16 ते 19 एप्रिल या कालावधीत विदर्भातील अनेक भागांत ‘हीटवेव्ह’ कायम राहण्याची शक्यता आहे. मध्य भारतातील तापमानात आगामी काळात आणखी 2 ते 4 डिग्री सेल्सिअसने वाढ होण्याची शक्यता वर्तवण्यात आली आहे. नजीकच्या भविष्यात उष्णतेपासून कोणताही दिलासा मिळण्याची चिन्हे नसल्याने, विदर्भवासियांना कडाक्याच्या उन्हाचा आणि लांबणीवर पडलेल्या उष्णतेच्या लाटेचा सामना करण्यासाठी सज्ज राहावे लागणार आहे.

हेही वाचा – Nagpur – Vidarbha Heat Wave : नागपूरसह विदर्भात उष्णतेची तीव्र लाट; हवामान विभागाने पुढील काही दिवसांत तापमानात आणखी वाढ होण्याचा दिला इशारा