Ahilyanagar: सणाआधी FDAचा अहिल्यानगरात मोठा दणका! तब्बल 75 हजार किलो बटर जप्त, MIDCत खळबळ
अहिल्यानगरमध्ये आगामी सण-उत्सवांच्या पार्श्वभूमीवर अन्न आणि औषध प्रशासनाने मोठी कारवाई केली आहे. निंबळक एमआयडीसीतील अरिहंत कोल्ड स्टोरेजवर टाकलेल्या धाडीत तब्बल ७५ हजार ३५६ किलो पाश्चराइज्ड कुकिंग बटरचा साठा जप्त करण्यात आला. या साठ्याची अंदाजे किंमत ३ कोटी ९५ लाख ६२ हजार रुपये असल्याने या कारवाईची जिल्हाभरात मोठी चर्चा सुरू झाली आहे.
सणासुदीच्या काळात मिठाई, दुग्धजन्य पदार्थ आणि खाद्यतेलांची मागणी मोठ्या प्रमाणात वाढते. या पार्श्वभूमीवर भेसळयुक्त किंवा निकृष्ट दर्जाचे अन्नपदार्थ बाजारात येऊ नयेत, यासाठी FDAने विशेष तपासणी मोहीम हाती घेतली आहे. त्याच मोहिमेचा भाग म्हणून अधिकाऱ्यांनी रात्री उशिरा निंबळक एमआयडीसीतील कोल्ड स्टोरेजवर छापा टाकला.
तपासणीदरम्यान ‘मधुरामा क्रीमी डिलाईट’ या ब्रँडच्या पाश्चराइज्ड कुकिंग बटरच्या दर्जाबाबत तसेच उत्पादनावरील लेबलिंगमध्ये संशयास्पद बाबी आढळल्याचे प्राथमिक तपासात समोर आले. त्यानंतर संपूर्ण साठा ताब्यात घेण्याची कारवाई करण्यात आली.
अधिकाऱ्यांनी विविध बॅचमधील चार नमुने स्वतंत्रपणे प्रयोगशाळेत तपासणीसाठी पाठवले आहेत. या नमुन्यांच्या अहवालानंतर बटरची गुणवत्ता, उत्पादन नियमांचे पालन झाले आहे का आणि त्यात कोणतीही भेसळ किंवा निकृष्ट दर्जा आहे का, हे स्पष्ट होणार आहे.
FDAच्या अधिकाऱ्यांनी सांगितले की, प्रयोगशाळेच्या अहवालात अन्न सुरक्षा नियमांचे उल्लंघन किंवा भेसळ आढळल्यास संबंधितांवर कठोर कायदेशीर कारवाई करण्यात येईल. सणांच्या काळात ग्राहकांच्या आरोग्याशी तडजोड होऊ नये, यासाठी अशा धाडी पुढेही सुरू राहणार असल्याचा इशाराही प्रशासनाने दिला आहे.
या कारवाईमुळे दुग्धजन्य पदार्थांचा व्यापार करणाऱ्या व्यावसायिकांमध्ये खळबळ उडाली आहे. दरम्यान, नागरिकांनी पनीर, बटर, खवा आणि मिठाईसारखे पदार्थ खरेदी करताना पॅकिंग, उत्पादनाची तारीख, लेबलवरील माहिती आणि विश्वासार्ह विक्रेत्याकडूनच खरेदी करण्याचे आवाहन अन्न व औषध प्रशासनाने केले आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.