US Israel-Iran War : इराणचा ट्रम्प यांना ‘आरपार’चा इशारा! 1 कोटी 40 लाख नागरिक बलिदानासाठी सज्ज; होर्मुझ सामुद्रधुनीवरून युद्ध पेटणार?

Iran president says 14 million citizens ready for sacrifice : अमेरिकेचे राष्ट्राध्यक्ष डोनाल्ड ट्रम्प यांनी होर्मुझची सामुद्रधुनी खुली करण्यासाठी इराणला दिलेली अंतिम मुदत संपत आली असतानाच, पश्चिम आशियातील तणावाने आता टोक गाठले आहे. ट्रम्प यांनी इराणला एका रात्रीत जगाच्या नकाशावरून पुसून टाकण्याची धमकी दिली असून, त्याला इराणचे राष्ट्राध्यक्ष मसूद पेझेश्कियन यांनी सडेतोड उत्तर दिले आहे. "देशाच्या रक्षणासाठी 1 कोटी 40 लाखांहून अधिक इराणी नागरिक आपल्या प्राणांचे बलिदान देण्यासाठी सज्ज आहेत आणि मी स्वतःही त्यांच्यासोबत शहीद व्हायला तयार आहे," असे खळबळजनक विधान पेझेश्कियन यांनी मंगळवारी केले.

डोनाल्ड ट्रम्प यांची अंतिम मुदत आणि धमकी
व्हाईट हाऊसमधून पत्रकार परिषदेला संबोधित करताना डोनाल्ड ट्रम्प यांनी अत्यंत आक्रमक भूमिका मांडली आहे. होर्मुझ सामुद्रधुनीचा मार्ग मोकळा करण्यासाठी त्यांनी मंगळवारी रात्री 8 वाजेपर्यंतची (ईस्टर्न टाइम) वेळ दिली आहे. जर या मुदतीत इराणने निर्णय घेतला नाही, तर इराणच्या संपूर्ण पायाभूत सुविधा एका रात्रीत नष्ट केल्या जातील, असा इशारा त्यांनी दिला. विशेष म्हणजे, अशा कारवाई दरम्यान संभाव्य युद्ध गुन्ह्यांची (War Crimes) आपल्याला मुळीच चिंता वाटत नसल्याचेही ट्रम्प यांनी स्पष्टपणे सांगून जगाला हादरवून सोडले आहे.

इराणकडून मानवी साखळीचे आवाहन
अमेरिकेच्या या दबावापुढे झुकण्यास इराणने स्पष्ट नकार दिला असून, उलट युद्धाचे आव्हान स्वीकारले आहे. संभाव्य हल्ल्यांपासून वीज प्रकल्पांसारख्या महत्त्वाच्या ठिकाणांचे रक्षण करण्यासाठी इराणी अधिकाऱ्यांनी तरुणांना या ठिकाणांभोवती 'मानवी साखळी' तयार करण्याचे आवाहन केले आहे. इराणने सध्याचा युद्धविरामाचा प्रस्तावही फेटाळून लावला असून, हा संघर्ष एकदाचा कायमचा मिटवून टाकण्याची मागणी केली आहे. ट्रम्प यांची मुदत जवळ येत असताना संपूर्ण इराणमध्ये आता देशप्रेमाचे वारे वाहू लागले असून लोक रस्त्यावर उतरत आहेत.

हेही वाचा – Donald Trump Warn Iran : 'आज रात्री संपूर्ण संस्कृतीचा अंत होईल', डोनाल्ड ट्रम्पची इराणला सर्वात मोठी धमकी; 48 तासांच्‍या अल्‍टिमेटमकडे संपूर्ण जगाचे लक्ष

अमेरिका आणि इस्रायलचे इराणवर भीषण हल्ले
राजकीय धमक्यांसोबतच प्रत्यक्ष युद्धभूमीवरही हल्ल्यांची तीव्रता वाढली आहे. अमेरिका आणि इस्रायलने इराणमधील शिराझ येथील पेट्रोकेमिकल प्रकल्पासह अनेक मोक्याच्या ठिकाणांना लक्ष्य केले आहे. इराणमधील प्रसारमाध्यमांनी दिलेल्या माहितीनुसार, या हल्ल्यांमध्ये मोठी जीवितहानी झाली आहे. इस्रायलने आता इराणी नागरिकांना सार्वजनिक वाहतूक व्यवस्था वापरू नका, असा सल्ला दिल्याने रेल्वे आणि इतर महत्त्वाच्या दळणवळण यंत्रणांवर लवकरच मोठे हल्ले होण्याची भीती वर्तवली जात आहे.

जागतिक चिंतेत भर आणि भविष्यातील संकट
होर्मुझची सामुद्रधुनी ही जागतिक तेल पुरवठ्यासाठी अत्यंत महत्त्वाची मानली जाते. इराणने माघार घेण्यास नकार दिल्याने आणि ट्रम्प आपल्या भूमिकेवर ठाम असल्याने, मंगळवारी रात्री 8 नंतर इराणवर महाभयंकर संकट ओढवण्याची शक्यता आहे. इराणची पुढील पावलेच आता हे युद्ध जागतिक महायुद्धात रूपांतरित होणार की नाही, हे ठरवतील. अमेरिका आणि इराणमधील हा संघर्ष केवळ दोन देशांपुरता मर्यादित न राहता संपूर्ण जगाच्या अर्थव्यवस्थेला खिळ घालणारा ठरू शकतो, अशी भीती तज्ज्ञांनी व्यक्त केली आहे.

हेही वाचा – Israel Warns Iran: आज रात्री नऊ वाजताची 'डेडलाईन'; इराणमध्ये महाप्रलय की आणखीन काही वेगळं?, इस्रायलचा रेल्वे प्रवासाबाबत गंभीर इशारा