Mahanagar Gas Price Hike : मध्य पूर्वेतील युद्ध तणावाचा गॅस दरांवर परिणाम; CNG प्रति किलो 2 रुपयांनी तर PNG प्रति 1 रुपयांनी महाग

मुंबई : महानगर गॅस लिमिटेडने (MGL) कॉम्प्रेस्ड नॅचरल गॅसचा (CNG) दर प्रति किलो 2 रुपयांनी आणि घरगुती पाईप नॅचरल गॅसचा (PNG) दर प्रति स्टँडर्ड क्यूबिक मीटर (SCM) 1 रुपयाने वाढवला आहे. मुंबई आणि आसपासच्या परिसरात सीएनजीचा सुधारित दर 88 रुपये प्रति किलो असेल. हे नवीन दर 1 सप्टेंबरच्या मध्यरात्रीपासून लागू होतील, असे कंपनीने एका निवेदनात म्हटले आहे.

हेही वाचा : Ramabai Ranveer Won Marathon : आईची जिद्द! हातात चप्पल, पायात टोचणारे रस्त्यावरचे खडे…, चक्क साडी नेसून धावली मॅरेथॉनमध्ये…पटकावला पहिला क्रमांक

एमजीएलने म्हटले आहे की, मध्य पूर्वेतील संकटामुळे आंतरराष्ट्रीय मानकांशी निगडित नैसर्गिक वायूच्या किमती वाढल्या आहेत. “मध्य पूर्वेतील सध्याच्या संकटामुळे आंतरराष्ट्रीय निर्देशांकांशी निगडित कच्च्या वायूच्या किमतीत लक्षणीय वाढ झाली आहे, हे लक्षात घेता एमजीएलने सीएनजीच्या किमतींमध्ये सुधारणा जाहीर केली आहे,” असे कंपनीने म्हटले आहे. किंमत सुधारणेमागील आणखी एक घटक म्हणून कंपनीने सीएनजीच्या मजबूत मागणीकडे लक्ष वेधले. सीएनजी विभागाला पुरवल्या जाणाऱ्या गॅसचा मोठा वाटा आयात केलेल्या स्पॉट रिगॅसिफाइड लिक्विफाइड नॅचरल गॅस (RLNG) मधून येतो, जो अधिक महाग झाला आहे.

एमजीएलने म्हटले आहे की, सीएनजीच्या दरात झालेली 2 रुपयांची वाढ ही उत्पादन खर्चातील वाढ केवळ अंशतः भरून काढेल. ग्राहकांना सीएनजीचा अखंड पुरवठा सुनिश्चित करणे, हा या निर्णयाचा उद्देश असल्याचेही कंपनीने सांगितले. उल्लेखनीय म्हणजे, महाराष्ट्रातील मुंबई, ठाणे, रायगड, रत्नागिरी, लातूर आणि धाराशिव तसेच कर्नाटकातील चित्रदुर्ग आणि दावणगेरे या भागातील सुमारे 13 लाख CNG वाहने MGL च्या गॅस वितरण नेटवर्कवर अवलंबून आहेत.

घरगुती पीएनजी ग्राहकांनाही अधिक पैसे मोजावे लागतील. एमजीएलने प्रति एससीएम 1 रुपयाने दर वाढवला असून, त्याचा परिणाम सुमारे 30 लाख कुटुंबांवर होणार आहे. दिल्ली-एनसीआर आणि लगतच्या परिसरात सीएनजीचा पुरवठा करणाऱ्या इंद्रप्रस्थ गॅस लिमिटेडने (आयजीएल) आपल्या सीएनजीची किंमत प्रति किलो 3.89 रुपयांनी वाढवून 86.98 रुपये प्रति किलो केल्यानंतर काही दिवसांनी ही दरसुधारणा झाली आहे. या दरवाढीसाठी आयजीएलने वाढलेल्या उत्पादन खर्चाचे कारणही दिले होते.