IndiGo Flight Service: एअरलाईनच्या CEO कडून माफीनामा; सेवा सुरळीत होण्याबद्दल अंदाज व्यक्त
मुंबई: देशभरातील विमानसेवेत मोठी खळबळ उडवत इंडिगोच्या उड्डाणांमध्ये शुक्रवारी गंभीर अडथळे निर्माण झाले. एका दिवसात 1000 हून अधिक उड्डाणे रद्द झाल्याने लाखो प्रवाशांचे नियोजन बिघडले. इंडिगोचे मुख्य कार्यकारी अधिकारी पीटर एल्बर्स यांनी व्हिडिओ संदेशाद्वारे परिस्थितीवर भाष्य करताना, ही अडचण शनिवारनंतर हळूहळू कमी होईल असा विश्वास व्यक्त केला. एल्बर्स यांनी सांगितले की, शुक्रवारी इंडिगोच्या एकूण उड्डाणांपैकी जवळपास 50 टक्के उड्डाणे रद्द करावी लागली. या स्थितीवर लवकर नियंत्रण मिळवण्यासाठी कंपनीतर्फे तीन टप्प्यांत सुधारणा उपाययोजना राबवल्या जात आहेत. “ग्राहकांशी सातत्याने संवाद राखणे आणि त्यांच्या गरजांनुसार सेवा स्थिर करणे ही सध्या आमची प्राथमिकता आहे. 10 ते 15 डिसेंबर दरम्यान सेवा पूर्ववत होण्याची शक्यता आहे,” असे त्यांनी स्पष्ट केले.
प्रवाशांना सोशल मीडियासह विविध माध्यमांतून सतत माहिती पुरवली जात आहे. तिकिटांच्या परताव्यासाठी स्वतंत्र कॉल सेंटर सुरू करण्यात आले असून संबंधित प्रक्रिया वेगाने सुरू आहे. गुरुवारपासून अनेक प्रमुख विमानतळांवर झालेल्या गोंधळामुळे प्रवाशांची प्रतीक्षा वाढली होती, मात्र शुक्रवारी अडकलेल्या प्रवाशांना प्रवासाची सोय उपलब्ध करून देण्यासाठी प्रयत्न होत असून त्याला काही प्रमाणात यशही मिळाले. “ज्यांना उड्डाण रद्द झाल्याचा संदेश पाठवण्यात आला आहे, त्यांनी अनावश्यक गर्दी टाळण्यासाठी विमानतळावर येऊ नये,” असेही एल्बर्स यांनी आवाहन केले.
ते म्हणाले, “शनिवारपासून इंडिगोची सेवा नव्या आराखड्याने सुरू करण्यासाठीच शुक्रवारी मोठ्या प्रमाणावर उड्डाणे रद्द करण्याचा कठोर निर्णय घेतला. यापूर्वीचे उपाय पर्याप्त ठरत नसल्याने संपूर्ण नियोजन पुनर्रचित करण्यात आले आहे.” उड्डाण कर्मचाऱ्यांच्या कामाच्या तासांवरील मर्यादा (Flight Duty Time Limitation) शिथिल केल्याने सेवेच्या पुनर्बांधणीत मदत होईल, असेही त्यांनी नमूद केले.
दरम्यान, इंडिगोची उड्डाणे रद्द होताच इतर विमान कंपन्यांनी तिकिटांचे दर मोठ्या प्रमाणात वाढवले असल्याचे स्पष्ट दिसून आले. काही प्रवाशांनी दिलेल्या माहितीनुसार, मुंबई-कोलकाता मार्गावरील शनिवारीच्या तिकिटांचे दर 60000 ते 70000 रुपयांपर्यंत पर्यंत गेले. दिल्लीसाठीचे तिकीटही 50000 रुपयांच्या आसपास दिसत होते. रात्रीपर्यंत दिल्ली, चेन्नई आणि कोलकाता मार्गांवरील शनिवारीच्या उड्डाणांचे दर 20000 ते 25000 रुपयांपर्यंत पोहोचले.
गोवा मार्गावरील तिकिटांसाठीही 22000 ते 36000 रुपयांचा दर आकारला जात असल्याचे समोर आले. ही संपूर्ण परिस्थिती प्रवाशांसाठी मोठ्या गैरसोयीची ठरली असली तरी, अफवांवर विश्वास न ठेवता अधिकृत माहितीकडे लक्ष देणे आणि अनावश्यक प्रवास टाळणे अत्यावश्यक असल्याचा संदेश या घटनेतून अधोरेखित होतो.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.