Elon Musk: इतिहासात पहिल्यांदाच! एलन मस्क हे 500 अब्ज डॉलरची संपत्ती मिळवणारे जगातील पहिले अब्जाधीश

टेस्ला कंपनीचे सर्वेसर्वा एलन मस्क यांनी संपत्ती कमावण्याच्या बाबतीत नवा इतिहास रचला आहे. फोर्ब्सच्या अब्जाधीश निर्देशांकानुसार, बुधवारी दुपारी 4:15 वाजता मस्क यांची निव्वळ संपत्ती 500.1 अब्ज डॉलर इतकी झाली. अशा प्रकारे ते 500 अब्ज डॉलरची संपत्ती गाठणारे पहिले अब्जाधीश ठरले आहेत.

मस्क यांच्या संपत्तीतला मोठा हिस्सा टेस्लाशी जोडलेला आहे. कंपनीत त्यांचा 12.4 टक्क्यांहून अधिक हिस्सा आहे. टेस्लाच्या शेअर्सनी यावर्षी 14 टक्क्यांहून अधिक वाढ केली असून फक्त बुधवारीच 3.3 टक्क्यांची वाढ नोंदवली. या वाढीमुळे मस्क यांच्या संपत्तीत तब्बल 6 अब्ज डॉलरची भर पडली. वर्षाच्या सुरुवातीला कंपनीसमोर काही अडचणी असल्या तरी मस्क यांनी पुन्हा सक्रिय सहभाग घेतल्याने गुंतवणूकदारांचा विश्वास वाढला आहे.

टेस्लाच्या रॉबिन डेन्होल्म यांनी नुकतेच सांगितले की, मस्क पुन्हा “कंपनीच्या केंद्रस्थानी” आले आहेत. त्यानंतर मस्क यांनी जवळपास 1 अब्ज डॉलर किमतीचे टेस्लाचे शेअर्स विकत घेऊन कंपनीच्या भविष्यातील क्षमतेवर विश्वास दाखवला. टेस्ला केवळ इलेक्ट्रिक कारपुरती मर्यादित न राहता कृत्रिम बुद्धिमत्ता (AI) आणि रोबोटिक्स क्षेत्रात विस्तार करत आहे.

तथापि, कमी विक्री आणि नफा घटल्यामुळे टेस्ला अजूनही “मॅग्निफिसंट सेवन” तंत्रज्ञान कंपन्यांच्या तुलनेत मागे आहे. या पार्श्वभूमीवर कंपनीच्या संचालक मंडळाने मस्क यांना 1 ट्रिलियन डॉलरचे पे पॅकेज देण्याचा प्रस्ताव मांडला आहे.

दरम्यान, मस्क यांच्या इतर कंपन्यांचीही वाढ झपाट्याने होत आहे. त्यांची AI स्टार्टअप xAI जुलै महिन्यात 75 अब्ज डॉलरवर पोहोचली होती. पुढील टप्प्यात ती 200 अब्ज डॉलर मूल्यांकनाच्या दिशेने जाऊ शकते, अशी शक्यता वर्तवली जात आहे. याशिवाय, त्यांची स्पेसएक्स कंपनी सध्या 400 अब्ज डॉलरच्या संभाव्य मूल्यांकनावर चर्चा करत आहे.

सध्या मस्क यांच्या मागे ओरेकलचे संस्थापक लॅरी एलिसन आहेत. त्यांची संपत्ती 350.7 अब्ज डॉलर इतकी असल्याचे फोर्ब्सने नमूद केले आहे.