Donald Trump: ‘भारतीय म्हणजे…’; युद्धजन्य परिस्थितीमुळे सैरभैर झालेले डोनाल्ड ट्रम्प भारताविरोधात बरळले
अमेरिकेचे राष्ट्राध्यक्ष डोनाल्ड ट्रम्प यांनी अमेरिकन रेडिओ होस्ट मायकेल सॅव्हेज यांचे एक वादग्रस्त पत्र पुन्हा शेअर केल्याने नवा वाद निर्माण झाला आहे. या पत्रात भारत, चीन आणि इतर देशांविषयी आक्षेपार्ह भाष्य करण्यात आले असून त्यांना “हेलहोल” असे संबोधण्यात आले आहे.
या पत्रात अमेरिकेतील जन्मसिद्ध नागरिकत्व (Birthright Citizenship) कायद्यावर तीव्र टीका करण्यात आली आहे. सॅव्हेज यांनी अमेरिकन न्यायालयात सुरू असलेल्या चर्चेच्या पार्श्वभूमीवर प्रतिक्रिया देत म्हटले की, या विषयावर न्यायालयाऐवजी राष्ट्रीय जनमत चाचणी व्हायला हवी. गैर-नागरिकांच्या मुलांना जन्माच्या आधारावर नागरिकत्व देण्याच्या व्यवस्थेला त्यांनी विरोध दर्शवला.
सॅव्हेज यांनी त्यांच्या पत्रात “बर्थ टुरिझम”चा उल्लेख करत असा दावा केला की, काही लोक अमेरिकेत येऊन शेवटच्या टप्प्यात बाळाला जन्म देतात आणि त्या माध्यमातून नागरिकत्व मिळवतात. त्यांनी असेही म्हटले की, अशा पद्धतीने नागरिकत्व मिळाल्यानंतर संबंधित कुटुंबीयांना भारत, चीन किंवा इतर देशांतून अमेरिकेत आणले जाते.
या पत्रात भारतीय आणि चिनी स्थलांतरितांबाबतही आक्षेपार्ह शब्दांचा वापर करण्यात आला आहे. सॅव्हेज यांनी त्यांना “लॅपटॉप गँगस्टर्स” असे संबोधत अमेरिकन मूल्यांचा अपमान केल्याचा आरोप केला. या विधानांमुळे वंशविद्वेष आणि द्वेषपूर्ण भाषणाचा मुद्दा पुन्हा चर्चेत आला आहे.
दरम्यान, ट्रम्प यांनी हे पत्र त्यांच्या सोशल मीडिया प्लॅटफॉर्मवर शेअर केल्यानंतर आणखी एक दावा केला की, अमेरिकेशिवाय जगात कुठेही जन्मसिद्ध नागरिकत्व दिले जात नाही. मात्र प्रत्यक्षात कॅनडा, मेक्सिको आणि दक्षिण अमेरिकेतील अनेक देशांमध्ये अशी व्यवस्था अस्तित्वात आहे.
या प्रकरणामुळे अमेरिकेतील स्थलांतर धोरण, नागरिकत्व कायदे आणि वंशविद्वेष या विषयांवर पुन्हा एकदा तीव्र चर्चा सुरू झाली आहे. तज्ज्ञांच्या मते, अशा विधानांमुळे आंतरराष्ट्रीय संबंधांवरही परिणाम होऊ शकतो.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.