Cigarette Price Hike: नवीन GST अन् एक्साइज ड्युटीचा दणका; केंद्र सरकारच्या कररचनेमुळे सिगारेटच्या किमतीत मोठी वाढ

Cigarette Price Hike: धूम्रपान करणाऱ्यांच्या खिशाला पुन्हा एकदा मोठा चाट बसणार आहे. देशव्यापी तंबाखू उत्पादक कंपनी आयटीसी लि. (ITC) ने आपल्या प्रमुख आणि सर्वाधिक विक्री होणाऱ्या सिगारेट ब्रँड्सच्या किमतीत पुन्हा एकदा भरघोस वाढ केली आहे. मिळालेल्या माहितीनुसार, गोल्ड फ्लेक सुपर स्टारच्या 10 सिगारेटच्या पाकिटाचे दर थेट 89 रुपयांवर पोहोचले असून, गेल्या काही महिन्यांतील दरवाढ लक्षात घेता या ब्रँडच्या दरात एकूण 51 टक्क्यांची प्रचंड वाढ नोंदवली गेली आहे. त्याचप्रमाणे क्लासिक कनेक्टच्या 20 सिगारेटच्या पॅकची किंमत 390 रुपयांवरून 428 रुपयांवर गेली असून, गेल्या 9 महिन्यांत हा ब्रँड तब्बल 42.66 टक्क्यांनी महागला आहे.

गोल्ड फ्लेक प्रीमियमच्या दरात 3 महिन्यांत दोनदा वाढ

कंपनीच्या अतिशय लोकप्रिय असलेल्या ‘गोल्ड फ्लेक प्रीमियम’ या ब्रँडच्या दरात चालू 2026 या वर्षात दुसऱ्यांदा वाढ करण्यात आली आहे. यापूर्वी जून महिन्यात याच्या 10 सिगारेटच्या पाकिटाची किंमत 115 रुपयांवरून 125 रुपये करण्यात आली होती. आता त्यात पुन्हा 8 टक्क्यांची वाढ करून नवीन दर 135 रुपये निश्चित करण्यात आला आहे. म्हणजेच अवघ्या 3 महिन्यांच्या कालावधीत या विशिष्ट ब्रँडच्या किमती तब्बल 17.4 टक्क्यांनी वाढल्या आहेत. याशिवाय गोल्ड फ्लेक सुपर स्टारच्या 10 सिगारेटच्या पॅकेटमध्ये 12.66 टक्क्यांची वाढ होऊन ते आता 89 रुपयांना मिळणार आहे.

हेही वाचा – CDSCO New Guidelines: डोकेदुखी किंवा तापाची गोळी ठरू शकते प्राणघातक; केंद्र सरकारचा मोठा इशारा

नवीन कररचना आणि उत्पादन शुल्कातील वाढ ठरली दरवाढीला कारणीभूत

सिगारेटच्या दरात सातत्याने होणाऱ्या या वाढीमागे केंद्र सरकारची सुधारित करप्रणाली हे मुख्य कारण मानले जात आहे. 1 फेब्रुवारी 2026 पासून तंबाखूजन्य उत्पादनांवर 40 टक्के जीएसटी लागू करण्यात आला आहे. यासोबतच सिगारेटची लांबी आणि त्याचा फिल्टर प्रकार या घटकांवर आधारित अतिरिक्त उत्पादन शुल्क (Excise Duty) आकारण्यात येत आहे. या नव्या आणि कडक कररचनेमुळे वाढलेला उत्पादन खर्चाचा भार थेट ग्राहकांवर टाकला जात असून, त्याचाच परिणाम म्हणून आयटीसीने आपल्या सर्व प्रमुख ब्रँड्सचे किरकोळ दर वाढवले आहेत.