Explosive In Flight: बंगळूर विमानतळावर बॉम्बच्या बातमीने उडाली मोठी खळबळ; टिश्यू पेपरवर लिहिलेल्या ‘त्या’ एका संदेशाने प्रवाशांचा जीव टांगणीला
बंगळूरमधील केम्पेगौडा आंतरराष्ट्रीय विमानतळ येथे शनिवारी 4 एप्रिल 2026 रोजी संध्याकाळी मोठी खळबळ उडाली, जेव्हा दिल्लीला जाणाऱ्या इंडिगो कंपनीच्या विमानात बॉम्ब असल्याची माहिती समोर आली. या घटनेनंतर तातडीने विमान रिकामे करण्यात आले आणि प्रवाशांमध्ये काही काळ भीतीचे वातावरण निर्माण झाले होते.
ही घटना सायंकाळी सुमारे सात वाजण्याच्या सुमारास घडली. विमान उड्डाणासाठी सज्ज होत असताना एका प्रवाशाला वॉशरूममध्ये टिश्यू पेपरवर लिहिलेला संशयास्पद संदेश आढळला. त्या नोटमध्ये विमानात स्फोटक ठेवले असल्याचा इशारा देण्यात आला होता. याची माहिती तात्काळ केबिन क्रूला देण्यात आली.
परिस्थितीचे गांभीर्य लक्षात घेऊन विमानाच्या वैमानिकाने तत्काळ एअर ट्रॅफिक कंट्रोलला कळवले. सुरक्षा नियमांनुसार सर्व प्रवाशांना विमानातून सुरक्षितपणे खाली उतरवण्यात आले. त्यानंतर सुरक्षा यंत्रणांनी संपूर्ण विमानाची सखोल तपासणी सुरू केली.
तपासणीदरम्यान विमानात कोणतीही संशयास्पद वस्तू किंवा स्फोटक आढळले नाही. त्यामुळे ही केवळ अफवा असल्याचे स्पष्ट झाले. सुमारे काही तासांच्या तपासणीनंतर संबंधित विमान पुन्हा उड्डाणासाठी तयार करण्यात आले आणि ते त्याच्या गंतव्यस्थानाकडे रवाना झाले.
दरम्यान, या प्रकरणाची चौकशी सुरक्षा यंत्रणांकडून सुरू असून धमकीची नोट कोणी लिहिली याचा शोध घेतला जात आहे. अशा प्रकारच्या अफवांमुळे सुरक्षेचा प्रश्न निर्माण होतो, त्यामुळे दोषींवर कठोर कारवाई होण्याची शक्यता आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.