Vanita Kharat: ‘कुरिअरच्या नावाने फोन आला आणि…’, वनिता खरातने उघड केला WhatsApp हॅकचा धक्कादायक प्रकार

मुंबई: ऑनलाइन फसवणुकीच्या घटना दिवसेंदिवस वाढत असून आता या सायबर जाळ्यात कलाकारही अडकत आहेत. मराठी अभिनेत्री आणि ‘महाराष्ट्राची हास्यजत्रा’मधून घराघरात पोहोचलेली वनिता खरात हिलाही अशाच एका धक्कादायक स्कॅमचा सामना करावा लागला. हा प्रकार उघड करत तिने सोशल मीडियावर चाहत्यांना सावध राहण्याचे आवाहन केले आहे.

वनिता खरातने व्हिडिओद्वारे संपूर्ण घटना सांगताना स्पष्ट केले की, एका कुरिअर डिलिव्हरीच्या नावाखाली तिच्याशी संपर्क साधण्यात आला. सुरुवातीला समोरच्या व्यक्तीने तिचे पार्सल पोहोचवण्यासाठी पत्ता पुन्हा पाठवण्याची विनंती केली. मात्र, ऑनलाइन ऑर्डर करताना पत्ता आधीच दिलेला असल्याने तिला संशय आला. तरीही वारंवार फोन येत असल्याने तिने त्या व्यक्तीने दिलेल्या क्रमांकावर संपर्क साधला.

याच क्षणापासून सगळा प्रकार बदलला. काही सेकंदांतच तिचे WhatsApp खाते बंद झाले आणि ती स्वतःच्या अकाउंटमधून लॉगआउट झाली. त्यानंतर तिच्या मोबाईलवरील कॉल्स दुसऱ्या क्रमांकावर वळवण्यात आले. एवढेच नाही तर तिच्या संपर्क यादीतील अनेकांना तिच्या नावाने मदतीसाठी संदेश पाठवण्यात आला.

या संदेशांमध्ये “मी मोठ्या अडचणीत आहे, कृपया तातडीने पैसे पाठवा” असा मजकूर होता. काही जणांनी तो संदेश खरा समजून आर्थिक मदतही केली. ही बाब समजल्यानंतर वनिताला मोठा धक्का बसला आणि तिने लगेच खाते पुन्हा मिळवण्यासाठी आवश्यक प्रक्रिया सुरू केली.

अखेर तिचे WhatsApp खाते सुरक्षितपणे परत मिळाले. मात्र, या अनुभवातून तिने सर्वांना महत्त्वाचा सल्ला दिला. कोणत्याही कुरिअर कंपनीच्या नावाने फोन आल्यास किंवा संशयास्पद क्रमांकावर संपर्क करण्यास सांगितल्यास आधी खात्री करून घ्या. तसेच WhatsApp किंवा इतर सोशल मीडिया अकाउंटवरून पैशांची मागणी करणारा संदेश आला, तर पैसे पाठवण्यापूर्वी संबंधित व्यक्तीशी थेट फोनवर संपर्क साधून पडताळणी करावी.

वनिताने या प्रकरणात प्रसिद्ध कुरिअर कंपनीचे नाव वापरून फसवणूक केली जात असल्याकडेही लक्ष वेधले. अशा प्रकारच्या बनावट कॉल्समुळे अनेक नागरिक गोंधळात पडू शकतात. त्यामुळे संबंधित कंपन्यांनीही ग्राहकांच्या सुरक्षेसाठी अधिक कडक उपाययोजना करणे गरजेचे असल्याचे तिने म्हटले.