Actor Dharmendra Hospitalised : ज्येष्ठ अभिनेते धर्मेंद्र रुग्णालयात दाखल; श्वास घेण्यासाठी त्रास होत असल्याने ICU मध्ये उपचार सुरू
मुंबई : ज्येष्ठ अभिनेते धर्मेंद्र (वय 89) यांना मुंबईतील ब्रीच कँडी हॉस्पिटलमध्ये दाखल करण्यात आले आहे. सूत्रांच्या माहितीनुसार, धर्मेंद्र गेल्या 4 ते 5 दिवसांपासून उपचारासाठी रुग्णालयात आहेत. धर्मेंद्र यांचा 8 डिसेंबरला 90वा वाढदिवस असून, त्यांच्या तब्येतीबद्दल चाहत्यांमध्ये काळजी व्यक्त होत आहे. एप्रिल महिन्यात त्यांच्या डोळ्याची ग्राफ्ट (कॉर्नियल ट्रान्सप्लांट) शस्त्रक्रिया झाली होती. दरम्यान, सुरुवातीला त्यांच्या टीमने सांगितले की, धर्मेंद्र हे फक्त रूटीन तपासणीसाठी दाखल झाले आहेत आणि त्यांच्या प्रकृतीबद्दल चिंता करण्यासारखं काही नाही. मात्र, रुग्णालयातील एका अधिकाऱ्याने पत्रकार विक्की लालवाणी यांना दिलेल्या माहितीनुसार, धर्मेंद्र यांना श्वास घेण्यास त्रास झाल्याने हॉस्पिटलमध्ये आणण्यात आलं होतं. सध्या ते ICU मध्ये निरीक्षणाखाली असून त्यांची स्थिती पूर्णपणे स्थिर असल्याचं सांगण्यात आलं आहे.
रुग्णालयातील सूत्रांनी सांगितलं, “धर्मेंद्र यांना श्वास घेण्यात अडचण जाणवत होती. सध्या ते ICU मध्ये दाखल आहेत आणि त्यांची सर्व जीवनसत्त्वे (vitals) सामान्य आहेत हार्ट रेट 70, ब्लड प्रेशर 140/80, आणि युरिन आउटपुटही चांगलं आहे. त्यामुळे काळजीचं कारण नाही.”
धर्मेंद्र यांच्या प्रकृतीवर सतत लक्ष ठेवण्यात येत आहे. सध्या डिस्चार्जची तारीख निश्चित करण्यात आलेली नाही. त्यांचे पुत्र सनी देओल आणि बॉबी देओल यांनी आपले सर्व कार्यक्रम पुढे ढकलत वडिलांच्या तब्येतीची जबाबदारी घेतली आहे. धर्मेंद्र यांनी अलीकडेच ‘तेरी बातों में ऐसा उलझा जिया’ या चित्रपटात शाहरुख कपूर आणि कृति सेननसोबत भूमिका साकारली होती. लवकरच ते ‘इक्कीस’ या चित्रपटात दिसणार आहेत, ज्यामध्ये अमिताभ बच्चन यांचा नातू आगस्त्य नंदा मुख्य भूमिकेत आहे.
89 वर्षांच्या वयातही धर्मेंद्र हे सक्रिय आणि ऊर्जावान जीवनशैलीसाठी ओळखले जातात. गेल्या काही वर्षांत त्यांनी आरोग्याशी संबंधित काही शस्त्रक्रिया केल्या असल्या तरी, त्यांची सकारात्मक वृत्ती आणि चाहत्यांवरील प्रेम अजूनही तसंच आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.