मोठी बातमी! धनंजय देशमुखांवर हत्येच्या प्रयत्नाचा गंभीर आरोप; नेमकं काय घडलं?

बीड जिल्ह्यातील एका ढाब्यावर घडलेल्या कथित वादाच्या घटनेमुळे मोठी खळबळ उडाली आहे. या प्रकरणात धनंजय देशमुख यांच्याविरोधात खुनाच्या प्रयत्नाचा गुन्हा दाखल करण्यात आला असून, या घटनेनंतर जिल्ह्यात राजकीय आणि सामाजिक वर्तुळात चर्चांना उधाण आले आहे. मिळालेल्या माहितीनुसार, समाधान खिंडकर हे आपल्या काही मित्रांसह बीडमधील एका ढाब्यावर जेवणासाठी गेले होते. त्याच ठिकाणी धनंजय देशमुख आणि सोशल मीडियावर लोकप्रिय असलेले रील स्टार रविराज साबळे हे देखील उपस्थित होते. तक्रारदाराच्या म्हणण्यानुसार, ते रविराज साबळे यांना मोबाईलमध्ये एक व्हिडिओ दाखवत असताना अचानक धनंजय देशमुख यांच्या अंगरक्षकाने त्यांचा मोबाईल हिसकावून घेतला.

या प्रकाराबाबत विचारणा केल्यानंतर दोन्ही बाजूंमध्ये वाद निर्माण झाल्याचा आरोप करण्यात आला आहे. समाधान खिंडकर यांनी दिलेल्या तक्रारीत म्हटले आहे की, वाद वाढल्यानंतर धनंजय देशमुख यांनी अंगरक्षकाकडील बंदूक हातात घेतली आणि ती त्यांच्या कानाला लावत धमकावले. तसेच जीवे मारण्याचा प्रयत्न केल्याचाही गंभीर आरोप त्यांनी केला आहे. या तक्रारीच्या आधारे बीड ग्रामीण पोलिस ठाण्यात धनंजय देशमुख यांच्याविरोधात खुनाच्या प्रयत्नासह विविध कलमान्वये गुन्हा दाखल करण्यात आला आहे. मात्र, गुन्हा नोंदवूनही अद्याप त्यांना अटक करण्यात आलेली नसल्याची माहिती समोर आली आहे. त्यामुळे या प्रकरणात पोलिसांच्या भूमिकेबाबतही प्रश्न उपस्थित केले जात आहेत.

दरम्यान, तक्रारदार समाधान खिंडकर यांनी आरोपीला तातडीने अटक करण्याची मागणी केली आहे. या घटनेनंतर सोशल मीडियावरही विविध प्रतिक्रिया उमटताना दिसत आहेत. काहींनी या प्रकरणाची निष्पक्ष चौकशी व्हावी अशी मागणी केली आहे, तर काहींनी संपूर्ण घटनेमागील सत्य समोर आणण्याची अपेक्षा व्यक्त केली आहे. सध्या बीड ग्रामीण पोलिसांकडून या प्रकरणाचा अधिक तपास सुरू असून, ढाब्यावर उपस्थित असलेल्या व्यक्तींची चौकशी तसेच परिसरातील सीसीटीव्ही फुटेजची तपासणी केली जात असल्याची माहिती मिळत आहे. पुढील काही दिवसांत या प्रकरणात आणखी महत्त्वाची माहिती समोर येण्याची शक्यता व्यक्त केली जात आहे.