CBI Arrests IRCTC Officer : 3.98 लाख रुपयांच्या लाचप्रकरणी IRCTC च्या अधिकाऱ्यासह खासगी कंपनीच्या संचालकाला अटक; CBI ची कारवाई

मुंबई : 'तेजस' गाड्यांमधील खानपान सेवेशी (कॅटरिंग) संबंधित बिले मंजूर करून घेण्यासाठी 3.98 लाख रुपयांची लाच मागितल्या आणि ती स्वीकारल्याच्या आरोपावरून, केंद्रीय अन्वेषण विभागाने (CBI) 'इंडियन रेल्वे केटरिंग अँड टुरिझम कॉर्पोरेशन'च्या (IRCTC) एका वरिष्ठ अधिकाऱ्याला आणि कोलकातास्थित हॉस्पिटॅलिटी कंपनीच्या एका संचालकाला अटक केली आहे. एका खबऱ्याकडून मिळालेल्या माहितीच्या आधारे गुन्हा दाखल केल्यानंतर, बुधवारी IRCTC चे अधिकारी त्रिदिब बॅनर्जी आणि संबंधित कंपनीचे संचालक अमर ठक्कर यांना अटक करण्यात आली.

एजन्सीच्या अधिकाऱ्यांनी दिलेल्या माहितीनुसार, बॅनर्जी यांनी आपल्या पदाशी संबंधित कर्तव्यांचे अयोग्य आणि अप्रामाणिकपणे पालन करून कंपनीची बिले मंजूर करून देण्यासाठी 3.98 लाख रुपयांची मागणी केली. ती रक्कम दोन हप्त्यांत स्वीकारली. यातील 1.98 लाख रुपये एप्रिलमध्ये मंजूर झालेल्या बिलासाठी, तर 2 लाख रुपये जूनमध्ये मंजूर झालेल्या बिलासाठी घेण्यात आले होते. बुधवारी झालेल्या तपासादरम्यान, कथित लाचखोरीच्या संदर्भात मुंबईतील IRCTC च्या पश्चिम विभागीय कार्यालयात (West Zone Office) दोन्ही आरोपींची कसून चौकशी करण्यात आली. तसेच, एजन्सीने ठक्कर यांच्याकडील बॅगांमधून 4.50 लाख रुपये आणि 13,200 रुपये रोख रक्कम जप्त केल्याचेही समजते. त्या दोघांचे मोबाईल फोनही जप्त करण्यात आले. तसेच एजन्सीला त्यात आक्षेपार्ह व्हॉट्सॲप चॅट्स आढळले. आरोपी सरकारी अधिकारी आणि अटक केलेल्या खाजगी व्यक्तीच्या निवासस्थानीही शोध घेण्यात आला. ज्या दरम्यान आक्षेपार्ह कागदपत्रे जप्त करण्यात आली.

हेही वाचा : Phaltan Accident News : फलटण हादरलं! भरधाव वेगाने धावणाऱ्या कारचा भीषण अपघात; सहा मित्रांचा प्रवास ठरला शेवटचा, तिघांचा दुर्दैवी अंत

सीबीआयने ठक्करचा मुंबईस्थित सहकारी डी. परमार याचेही नाव घेतले असून, त्याने ठक्करच्या सूचनेनुसार बॅनर्जीच्या बँक खात्यात रोख रक्कम जमा केल्याचा आरोप आहे. या कथित भ्रष्टाचारात इतर अज्ञात व्यक्तींच्या भूमिकेचीही चौकशी करत असल्याचे एजन्सीने म्हटले आहे. सीबीआयच्या म्हणण्यानुसार, हॉस्पिटॅलिटी फर्मला गेल्या वर्षी नोव्हेंबरमध्ये अहमदाबाद-मुंबई आणि लखनौ-नवी दिल्ली तेजस मार्गांवर ऑनबोर्ड केटरिंग आणि संबंधित सेवा पुरवण्यासाठी आयआरसीटीसीचे कंत्राट मिळाले होते. जेवणाचा खर्च प्रवाशांच्या भाड्यात समाविष्ट असल्याने, कंत्राटदार प्रतिपूर्तीसाठी वेळोवेळी आयआरसीटीसीकडे बिले सादर करतो. एजन्सीने असा आरोप केला की, एप्रिल महिन्यात प्रलंबित देयके (पेमेंट्स) त्वरित मिळवण्यासाठी ठक्कर यांनी आयआरसीटीसीच्या (IRCTC) मुंबई पश्चिम विभागीय कार्यालयाशी संपर्क साधला. बॅनर्जी यांनी त्यांना अहमदाबाद विभागीय कार्यालयातून बिले पुढे पाठवण्यास सांगितले आणि नंतर ती मंजूर करण्यासाठी लाचेची मागणी केली. बिले मंजूर झाल्यानंतर, ठक्कर यांनी परमार यांना 21 एप्रिल रोजी चार एटीएम व्यवहारांद्वारे बॅनर्जी यांच्या खात्यात 1.98 लाख रुपये जमा करण्यास सांगितले.

सीबीआयचा आरोप आहे की, जूनमध्येही अशीच पद्धत अवलंबली गेली; तेव्हा एका नवीन बिलाला मंजुरी दिल्यानंतर बॅनर्जी यांनी आणखी 2 लाख रुपयांची मागणी केली. परमार यांच्यावर 8 जून रोजी चार एटीएम व्यवहारांद्वारे ही रक्कम जमा केल्याचा आरोप आहे. आरोपींविरुद्ध फौजदारी कट, लाचखोरी आणि गुन्ह्यास प्रवृत्त करणे यांसारख्या आरोपांखाली 'भारतीय न्याय संहिता' आणि 'भ्रष्टाचार प्रतिबंधक कायदा' यांच्या तरतुदींनुसार गुन्हे दाखल करण्यात आले आहेत. दरम्यान, आरोपींना विशेष न्यायालयाने 27 जुलैपर्यंत सीबीआय कोठडी सुनावली असून प्रकरणाचा पुढील तपास सुरू आहे.