Amarnath Yatra 2026: अमरनाथ यात्रेला ब्रेक! आजपासून दोन्ही मार्ग बंद, लाखो भाविकांच्या दर्शनावर परिणाम; पुढील आदेशाची प्रतीक्षा
जम्मू-काश्मीर: जम्मू-काश्मीरमधील प्रसिद्ध अमरनाथ यात्रेबाबत महत्त्वाची माहिती समोर आली आहे. प्रवासाच्या मार्गावर सुरू असलेली दुरुस्तीची कामे आणि आगामी खराब हवामानाचा अंदाज लक्षात घेऊन प्रशासनाने यात्रेला तात्पुरता विराम देण्याचा निर्णय घेतला आहे. 9 ऑगस्टपासून बालटाल मार्गही बंद केला जाणार असून, यामुळे अमरनाथ गुहेकडे जाणारे दोन्ही प्रमुख मार्ग सध्या भाविकांसाठी बंद राहणार आहेत.
दोन्ही मार्गांवर प्रवास थांबवला
यापूर्वी पहलगामकडील मार्गावरून यात्रा बंद करण्यात आली होती. आता बालटाल मार्गावरील प्रवासालाही स्थगिती देण्यात आली आहे. त्यामुळे पुढील आदेश येईपर्यंत भाविकांना या दोन्ही मार्गांवरून पवित्र गुहेकडे जाता येणार नाही. मात्र, या निर्णयाचा अर्थ 2026ची अमरनाथ यात्रा कायमस्वरूपी संपली असा नाही. यंदाची यात्रा 3 जुलै रोजी सुरू झाली असून तिचा नियोजित समारोप 28 ऑगस्टला रक्षाबंधनाच्या दिवशी होणार आहे.
4.8 लाखांहून अधिक भाविकांचे दर्शन
यात्रेला सुरुवात झाल्यापासून आतापर्यंत 4.8 लाखांपेक्षा जास्त भाविकांनी बाबा बर्फानींचे दर्शन घेतल्याची माहिती प्रशासनाकडून देण्यात आली आहे. पहलगाम आणि बालटाल या दोन्ही मार्गांवरून भाविक मोठ्या संख्येने यात्रेसाठी दाखल झाले होते. दरम्यान, अलीकडील मुसळधार पावसामुळे काही ठिकाणी यात्रा मार्गाचे नुकसान झाले आहे. त्यामुळे संवेदनशील भागांची दुरुस्ती आणि सुरक्षिततेशी संबंधित कामे हाती घेण्यात आली आहेत. बॉर्डर रोड्स ऑर्गनायझेशनकडून या मार्गांवर आवश्यक कामे केली जात आहेत.
हवामानाचाही परिणाम
यात्रा स्थगित करण्यामागे केवळ रस्ते दुरुस्तीचे कारण नाही. हवामान विभागाने पुढील काही दिवसांमध्ये खराब हवामानाची शक्यता व्यक्त केली आहे. डोंगराळ भागातील बदलते हवामान लक्षात घेता भाविकांच्या सुरक्षेला प्राधान्य देत प्रशासनाने हा निर्णय घेतला आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.