पुण्यात देवाच्या दारीही चोरी; दगडूशेठ गणपती मंदिरात सोन्याची चोरी

पुणे: पुणे शहरात पुन्हा एका चोरीच्या घटनेने खळबळ उडवली आहे. देवाच्या दारी, श्रद्धेच्या स्थानी असलेल्या प्रसिद्ध दगडूशेठ हलवाई गणपती मंदिरात दर्शनासाठी आलेल्या महिलेचा सोन्याचा दागिना चोरीला गेला. या प्रकारामुळे भाविकांमध्ये भीतीचे वातावरण निर्माण झाले असून, मंदिर परिसरातील सुरक्षा व्यवस्थेवर प्रश्नचिन्ह निर्माण झाले आहे.

विश्रामबाग पोलिसांनी तत्काळ कारवाई करत दोन महिला आरोपींना अटक केली असून, त्या दर्शन रांगेत उभ्या असलेल्या महिलेच्या गळ्यातील सोनसाखळी चोरी करताना आढळून आल्या. अटक करण्यात आलेल्या आरोपींची नावे माधुरी संतोष डुकरे आणि काव्या तनवीर जाधव अशी आहेत. या दोघींनी मिळून चोरीचा कट रचल्याचे पोलिस तपासात समोर आले आहे.

फिर्यादी महिला आपल्या लहान मुलीला घेऊन दर्शनासाठी मंदिरात आल्या होत्या. त्या दर्शन रांगेत थांबल्या असताना गर्दीचा फायदा घेत आरोपींनी त्यांच्या गळ्यातील सोन्याची चैन चोरून नेली. ही संपूर्ण घटना मंदिर परिसरात लावण्यात आलेल्या सीसीटीव्ही कॅमेऱ्यामध्ये स्पष्टपणे कैद झाली आहे.

हेही वाचा: वन्यजीव संरक्षण कायद्याचा भंग? छाया कदम यांच्या विरोधात तक्रार दाखल

सीसीटीव्ही फुटेजच्या आधारे पोलिसांनी तत्काळ आरोपी महिलांची ओळख पटवून त्यांना अटक केली. पोलिस अधिकाऱ्यांनी दिलेल्या माहितीनुसार, आरोपींनी यापूर्वीही अशाच प्रकारच्या चोऱ्या केल्या असल्याची शक्यता असून, त्यांचा अधिक तपास सुरू आहे. चोरीला गेलेल्या सोन्याच्या दागिन्यांची किंमत सुमारे 50 हजार रुपये असल्याचे प्राथमिक अंदाज आहे.

विश्रामबाग पोलीस ठाण्याचे वरिष्ठ पोलीस निरीक्षक यांनी सांगितले की, मंदिर परिसरात गर्दीचा फायदा घेऊन अशा प्रकारे चोऱ्या होऊ शकतात. त्यामुळे नागरिकांनी आपली मौल्यवान दागिने सुरक्षित ठेवावीत, शक्यतो घरातच ठेवावीत. तसेच पोलिसांनी मंदिर प्रशासनाशी समन्वय साधून सुरक्षेचे उपाय अधिक कडक करण्याचे निर्देश दिले आहेत.

दरवर्षी हजारो भाविक दगडूशेठ हलवाई गणपतीचे दर्शन घेण्यासाठी येतात. अशावेळी सुरक्षा ही सर्वोच्च प्राथमिकता असावी लागते. मंदिर प्रशासनानेही पोलिसांच्या मदतीने अतिरिक्त सुरक्षा रक्षकांची नेमणूक करण्याचा निर्णय घेतला आहे. याशिवाय सीसीटीव्ही कॅमेरे अधिक ठिकाणी बसवण्याचे काम तातडीने हाती घेण्यात आले आहे.

पोलिसांचा पुढील तपास सुरू असून, अटक केलेल्या महिलांशी संबंधित इतर टोळ्यांची माहिती मिळवण्याचा प्रयत्न सुरू आहे. दरम्यान, मंदिर परिसरात सुरक्षा व्यवस्थेत मोठे बदल होण्याची शक्यता आहे.भाविकांना आवाहन करण्यात आले आहे की, गर्दीच्या ठिकाणी जास्त मौल्यवान दागिने घालणे टाळावे आणि संशयास्पद हालचाली दिसल्यास तत्काळ पोलिसांशी संपर्क साधावा.