Beed Crime: बीड हादरलं! जन्मदात्या पित्यानेच चिमुकल्या मुलींवर डिझेल ओतून त्यांना पेटवण्याचा केला प्रयत्न, संतापजनक कारण समोर

बीड जिल्ह्यातील माजलगाव तालुक्यातील लहामेवाडी येथे घडलेल्या एका धक्कादायक घटनेमुळे परिसरात मोठी खळबळ उडाली आहे. पत्नी नांदायला येत नसल्याच्या रागातून एका पित्याने आपल्या दोन चिमुकल्या मुलींवर डिझेल ओतून त्यांना पेटवून देण्याचा प्रयत्न केल्याची संतापजनक घटना समोर आली आहे. सुदैवाने वेळेवर हस्तक्षेप झाल्यामुळे मोठा अनर्थ टळला असून दोन्ही मुलींचे प्राण वाचले आहेत. मिळालेल्या माहितीनुसार, आरोपी पिता आपल्या दोन मुलींना घेऊन घरासमोर आला होता. तो पत्नीला परत पाठवावे, तिने नांदायला यावे अशी मागणी करत मोठ्याने वाद घालत होता. त्याचवेळी त्याने सोबत आणलेल्या डिझेलच्या कॅनमधील इंधन मुलींच्या अंगावर ओतले. त्यानंतर परिसरात काही क्षण तणावाचे वातावरण निर्माण झाले. आरोपीच्या या कृतीमुळे उपस्थित नागरिकही काही काळ गोंधळले.

मात्र, या प्रसंगाची गंभीरता लक्षात घेऊन काही स्थानिक नागरिकांनी तत्काळ धाव घेतली. त्यांनी प्रसंगावधान राखत दोन्ही मुलींना आरोपीच्या तावडीतून बाजूला ओढले. त्यामुळे मोठी दुर्घटना टळली. नागरिकांनी तातडीने डिझेलचा कॅन देखील त्याच्या हातातून काढून घेतला आणि परिस्थिती नियंत्रणात आणली. या घटनेनंतर परिसरात भीतीचे आणि संतापाचे वातावरण पसरले. या संपूर्ण प्रकाराबाबत पीडित कुटुंबाने आपली आपबीती सांगितली आहे. मुलींच्या आजीने दिलेल्या माहितीनुसार, आरोपीने पत्नीच्या नांदण्याच्या प्रश्नावरून सतत वाद घालत हा टोकाचा प्रकार केला. जर नागरिकांनी वेळीच हस्तक्षेप केला नसता तर मोठा अनर्थ घडला असता, असेही त्यांनी सांगितले. या घटनेची माहिती मिळताच स्थानिक प्रशासन आणि पोलिस यंत्रणा सक्रिय झाली असून पुढील तपास सुरू आहे. परिसरात या घटनेबाबत तीव्र संताप व्यक्त केला जात आहे.