Akola Viral Story: आगळावेगळं लग्न! साडेतीन फूट उंचीचा नवरदेव, तीन फूट उंचीची नवरी; अनोख्या विवाहाने जिंकली सर्वांची मनं

अकोला जिल्ह्यातील एका अनोख्या विवाह सोहळ्याने सध्या सर्वांचे लक्ष वेधून घेतले आहे. उंचीने लहान असलेल्या वर-वधूने आयुष्यभरासाठी एकमेकांची साथ स्वीकारत समाजासमोर प्रेम आणि आत्मविश्वासाचा सुंदर संदेश दिला आहे. या विवाहाची शहरात आणि परिसरात मोठी चर्चा रंगली आहे.

अकोल्यातील अकोला येथील प्रतीक धानुका आणि मध्य प्रदेशातील सिरोज येथील रेणुका यांचा विवाह अलीकडेच सिरोज येथे पार पडला. पारंपरिक विधींनी आणि कुटुंबीयांच्या उपस्थितीत हा सोहळा उत्साहात संपन्न झाला. दोघांची उंची साधारणपणे साडेतीन आणि तीन फूट असली तरी त्यांच्या नात्यातील समजूतदारपणा आणि जुळलेली मनं यामुळे हा विवाह विशेष ठरला.

प्रतीक हे पुणे येथे ICICI Bank मध्ये रिलेशनशिप मॅनेजर म्हणून कार्यरत आहेत. तर रेणुका या सिरोजमधील एका शाळेत ग्रंथपाल म्हणून काम पाहतात. दोघेही उच्चशिक्षित आणि स्वावलंबी असल्याने त्यांच्या निर्णयाचे सर्वांनी स्वागत केले.

लग्नानंतर अकोल्यात भव्य स्वागत समारंभाचे आयोजन करण्यात आले. शहरातील खंडेलवाल लॉन्स येथे पार पडलेल्या या कार्यक्रमाला नातेवाईक, मित्रमंडळी आणि परिचितांनी मोठी उपस्थिती लावली. नवदांपत्याला शुभेच्छा देण्यासाठी आणि त्यांच्यासोबत छायाचित्रे काढण्यासाठी पाहुण्यांची स्टेजवर गर्दी झाली होती. वातावरण आनंद, उत्साह आणि आपुलकीने भरलेले होते.

या विवाहाने समाजात एक सकारात्मक संदेश दिला आहे. उंची, रूप किंवा बाह्य गोष्टींपेक्षा परस्पर समज, विश्वास आणि प्रेम अधिक महत्त्वाचे असते. अकोल्यातील या आगळ्यावेगळ्या लग्नामुळे अनेकांनी नवदांपत्याचे कौतुक करत त्यांना भावी आयुष्यासाठी शुभेच्छा दिल्या आहेत.