FIFA World Cup Final 2026 : फिफा विश्वचषक अंतिम सामन्याच्या पार्श्वभूमीवर महाराष्ट्र सरकारचा मोठा निर्णय; आज पहाटे 4 वाजेपर्यंत खुली राहणार रेस्टॉरंट-कॅफे

मुंबई : फुटबॉल चाहत्यांना फिफा विश्वचषक 2026 चा अंतिम सामना पाहता यावा, यासाठी महाराष्ट्र सरकारने राज्यभरातील खानावळ, हॉटेल्स आणि रेस्टॉरंट्सना 20 जुलै रोजी पहाटे 4 वाजेपर्यंत उघडे ठेवण्यास परवानगी दिली आहे. अंतिम सामन्याच्या रात्री हॉस्पिटॅलिटी आस्थापनांच्या कामकाजाच्या वेळेत वाढ करण्याची मागणी करणाऱ्या नॅशनल रेस्टॉरंट असोसिएशन ऑफ इंडिया (NRAI), मुंबईच्या विनंतीनंतर हा निर्णय घेण्यात आला. महाराष्ट्र पोलीस कायदा, 1951 च्या कलम 33 अंतर्गत गृह विभागाने जारी केलेल्या आदेशात, सरकारने अनेक अटींच्या अधीन राहून कामकाजाच्या वेळेत एक-वेळची शिथिलता दिली आहे.

हेही वाचा : FIFA World Cup 2026 Final: अर्जेंटिना आणि स्पेनमध्ये जेतेपदासाठी आज अंतिम लढत; वाचा कधी, कुठे आणि कसा पाहायचा सामना

कायदा व सुव्यवस्थेचा कोणताही प्रश्न निर्माण होऊ नये यासाठी, आस्थापनांना त्यांच्या परिसराच्या आत आणि बाहेर पुरेसे खाजगी सुरक्षा कर्मचारी तैनात करण्याचे निर्देश देण्यात आले आहेत. आस्थापनांच्या आवारात किंवा परिसरात घडणाऱ्या कोणत्याही अनुचित घटनेसाठी किंवा गुन्ह्यासाठी संबंधित मालक जबाबदार असतील आणि नियमांचे उल्लंघन झाल्यास त्यांच्यावर कारवाई केली जाऊ शकते. तसेच, ध्वनी प्रदूषण नियमांमधील सर्व तरतुदींचे आणि लाऊडस्पीकर व ध्वनी प्रवर्धक यंत्रणांच्या (साउंड ॲम्प्लिफिकेशन सिस्टिम्स) वापराबाबत सर्वोच्च न्यायालय व उच्च न्यायालयांनी दिलेल्या निर्देशांचे पालन करणे या आदेशानुसार आस्थापनांसाठी अनिवार्य करण्यात आले आहे. कामाच्या वेळेतील ही वाढ केवळ बंदिस्त इमारतींमध्ये किंवा जागांमध्ये कार्यरत असलेल्या आस्थापनांनाच लागू असेल.

Maharashtra government's decision in view of the FIFA World Cup final: Restaurants and cafes in Mumbai and Maharashtra will remain open until 4:00 am tomorrow. The match will be between Argentina and Spain and will start at 12:30 am. pic.twitter.com/wEHJWETwU5 — IANS (@ians_india) July 19, 2026