Saptashrungi Temple: भाविकांनो लक्ष द्या! सप्तशृंग गडावर ‘नो एन्ट्री’, मुसळधार पावसामुळे मंदिर बंद, घाट रस्ताही पूर्णपणे सील

नाशिक: नाशिक जिल्ह्यात सुरू असलेल्या मुसळधार पावसाचा परिणाम आता धार्मिक पर्यटनावरही दिसून येत आहे. प्रसिद्ध शक्तीपीठ असलेल्या सप्तशृंगी देवी मंदिरात भाविकांच्या सुरक्षेला प्राधान्य देत प्रशासनाने महत्त्वाचा निर्णय घेतला आहे. 7 जुलै ते 9 जुलै या कालावधीत सप्तशृंगी देवीचे मंदिर दर्शनासाठी पूर्णपणे बंद ठेवण्यात येणार असून गडाकडे जाणारा घाट रस्ताही सर्व प्रकारच्या वाहतुकीसाठी बंद करण्यात आला आहे.

गेल्या काही दिवसांपासून नाशिक जिल्ह्यात पावसाचा जोर वाढला आहे. हवामान विभागाने पुढील काही दिवस अतिमुसळधार पावसाचा इशारा दिल्यानंतर प्रशासनाने संभाव्य धोके लक्षात घेऊन ही खबरदारी घेतली आहे. विशेषतः सप्तशृंग गड परिसरात सुरू असलेल्या संततधार पावसामुळे डोंगर उतारांवरून दगड घसरून येणे आणि दरडी कोसळण्याचा धोका निर्माण झाला आहे. त्यामुळे भाविकांना गडावर जाण्यास तात्पुरती बंदी घालण्यात आली आहे.

घाट रस्त्यावर पोलिसांचा कडक बंदोबस्त ठेवण्यात आला आहे. गडाच्या पायथ्याशी बॅरिकेड्स उभारून सर्व प्रकारची वाहतूक थांबवण्यात आली आहे. पोलिस कर्मचारी आणि प्रशासनाची पथके २४ तास परिस्थितीवर लक्ष ठेवून आहेत. या कालावधीत कोणत्याही खासगी वाहनाला किंवा पर्यटकांना गडावर जाण्याची परवानगी दिली जाणार नाही. केवळ आपत्कालीन सेवांसाठी आवश्यक असलेल्या वाहनांनाच मुभा असेल.

प्रशासनाने भाविकांना स्पष्ट आवाहन केले आहे की, पुढील तीन दिवस सप्तशृंग गडावर जाण्याचा प्रयत्न करू नये. हवामानात सुधारणा झाल्यानंतर आणि परिसर सुरक्षित असल्याची खात्री झाल्यानंतरच मंदिर पुन्हा दर्शनासाठी खुले करण्यात येईल. त्यामुळे भाविकांनी सहकार्य करण्याचे आवाहन करण्यात आले आहे.

दरम्यान, राज्याचे मुख्यमंत्री देवेंद्र फडणवीस यांनीही नाशिक जिल्ह्यासाठी विशेष सतर्कतेचा इशारा दिला आहे. अरबी समुद्रात तयार झालेल्या तीव्र कमी दाबाच्या क्षेत्रामुळे 7 जुलै रोजी नाशिक, त्र्यंबकेश्वर आणि परिसरात ढगफुटीसदृश पाऊस होण्याची शक्यता व्यक्त करण्यात आली आहे. काही भागांमध्ये सुमारे 300 मिलिमीटरपर्यंत पावसाची नोंद होऊ शकते, असा अंदाज व्यक्त करण्यात आला आहे.

या पार्श्वभूमीवर जिल्हा प्रशासनाला सखल भागातील नागरिकांच्या सुरक्षिततेसाठी आवश्यक उपाययोजना करण्याच्या सूचना देण्यात आल्या आहेत. पाणी साचणाऱ्या भागांवर विशेष लक्ष ठेवणे, दरडी कोसळण्याची शक्यता असलेल्या ठिकाणी सतर्कता वाढवणे आणि पर्यटकांना सुरक्षित स्थळी हलवण्याचे निर्देशही देण्यात आले आहेत.

त्र्यंबकेश्वर आणि आसपासच्या पर्यटनस्थळांवरही विशेष खबरदारी घेतली जात असून पर्यटकांनी पुढील काही दिवस अनावश्यक प्रवास टाळावा, असे आवाहन करण्यात आले आहे. मुसळधार पावसाचा अंदाज लक्षात घेता प्रशासनाकडून परिस्थितीवर सातत्याने नजर ठेवली जात आहे. भाविक आणि पर्यटकांनी केवळ अधिकृत सूचनांवर विश्वास ठेवावा आणि स्वतःच्या सुरक्षिततेला प्राधान्य द्यावे, असे आवाहन पुन्हा एकदा करण्यात आले आहे.