मेलोनींना मूगा सिल्क स्टोल, UAE राष्ट्राध्यक्षांना ‘केसर’ आंबे; मोदींच्या खास भेटवस्तूंनी परदेशी नेते भारावले, भारताच्या हस्तकलेची जागतिक रंगमंचावर चर्चा
पंतप्रधान नरेंद्र मोदी यांच्या पाच देशांच्या परदेश दौऱ्यादरम्यान भारताची संस्कृती, हस्तकला आणि पारंपरिक वारसा पुन्हा एकदा जागतिक पातळीवर झळकताना दिसला. यूएई, नेदरलँड्स, स्वीडन, नॉर्वे आणि इटली या देशांच्या दौऱ्यात मोदींनी त्या-त्या देशांच्या प्रमुखांना भारताच्या विविध राज्यांतील खास पारंपरिक भेटवस्तू दिल्या. या भेटींमधून भारतीय कला, हस्तकला आणि स्थानिक परंपरांचा अनोखा परिचय जगाला झाला.
इटलीच्या पंतप्रधान जॉर्जिया मेलोनी यांना मोदींनी आसाममधील प्रसिद्ध मूगा सिल्कचा स्टोल भेट दिला. नैसर्गिक सोनेरी रंग आणि चमक यासाठी ओळखला जाणारा मूगा सिल्क हा ईशान्य भारताच्या सांस्कृतिक वारशाचा महत्त्वाचा भाग मानला जातो. यासोबतच मेलोनी यांना ‘शिरुई लिली’ डिझाइन असलेला खास सिल्क स्टोलही देण्यात आला. हा दुर्मिळ फुलांपासून प्रेरित डिझाइन असल्याने त्याची मोठी चर्चा रंगली.
इटलीचे राष्ट्राध्यक्ष सर्जिओ मत्तारेला यांना आग्र्यातील प्रसिद्ध पच्चीकारी कलेतून तयार करण्यात आलेला मार्बल इनले बॉक्स भेट देण्यात आला. तसेच पंडित भीमसेन जोशी आणि एम. एस. सुब्बुलक्ष्मी यांच्या संगीताच्या सीडीदेखील त्यांना देण्यात आल्या.
यूएई दौऱ्यात मोदींनी राष्ट्राध्यक्ष मोहम्मद बिन जायद अल नाहयान यांना गुजरातमधील जीआय टॅग असलेले ‘केसर’ आंबे भेट दिले. ‘क्वीन ऑफ मॅंगोज’ म्हणून ओळखल्या जाणाऱ्या या आंब्याची चव, सुगंध आणि केशरी रंग जगभर प्रसिद्ध आहे. याशिवाय यूएईच्या क्राउन प्रिन्सला राजस्थानच्या पारंपरिक कोफ्तगिरी कलेने सजवलेली कटार भेट देण्यात आली. भारतीय युद्धकलेचे प्रतीक मानली जाणारी ही कटार हस्तकलेचा उत्तम नमुना असल्याचे मानले जाते.
नेदरलँड्सचे राजा विलेम-अलेक्झांडर यांना राजस्थानातील प्रसिद्ध ब्लू पॉटरी भेट देण्यात आली. कोबाल्ट ब्लू रंग आणि आकर्षक डिझाइनमुळे ही पॉटरी जगभर प्रसिद्ध आहे. नेदरलँड्सच्या महाराणी मॅक्सिमा यांना मीनाकारी आणि कुंदन कलाकुसरीतील आकर्षक कानातले देण्यात आले. तसेच तेथील पंतप्रधानांना माशांच्या आकृतींवर आधारित मधुबनी पेंटिंग भेट देण्यात आली.
नॉर्वेचे पंतप्रधान जोनास गहर स्टोरे यांना सिक्कीममधील प्रसिद्ध ‘प्रेस्ड ऑर्किड’ पेंटिंग आणि ऑर्किड पेपरवेट्स देण्यात आले. स्वीडनचे पंतप्रधान उल्फ क्रिस्टर्सन यांना शांतिनिकेतन शैलीतील मॅसेंजर बॅग भेट देण्यात आली. या बॅगेत रवींद्रनाथ टागोर यांच्या सर्जनशील विचारांची झलक पाहायला मिळते.
याशिवाय काही देशांच्या नेत्यांना मणिपूरची लोकटक टी आणि लडाखी लोकर स्टोलसारख्या पारंपरिक वस्तूही देण्यात आल्या. मोदींच्या या भेटवस्तूंमुळे भारताच्या ‘लोकल टू ग्लोबल’ संकल्पनेला आंतरराष्ट्रीय स्तरावर पुन्हा एकदा मोठी प्रसिद्धी मिळाल्याचे मानले जात आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.