Jalgaon: जळगावात खळबळजनक घटना! गिरणा नदीत महिलेची उडी, शोध सुरू

जळगाव शहरालगतच्या गिरणा नदीवरील बांभोरी पुलावरून एका महिलेने नदीपात्रात उडी घेतल्याची धक्कादायक घटना घडली आहे. या घटनेमुळे काही काळ परिसरात एकच खळबळ उडाली. महिलेने हे टोकाचे पाऊल का उचलले, याचे नेमके कारण अद्याप समोर आलेले नसून पोलिसांसह ग्रामस्थांकडून तिचा कसून शोध सुरू आहे.

मिळालेल्या माहितीनुसार, बांभोरी पूल हा मुंबई-नागपूर महामार्गाला जोडणारा महत्त्वाचा मार्ग असल्याने घटनेनंतर वाहतुकीवर मोठा परिणाम झाला. पुलाच्या दोन्ही बाजूंना वाहनांच्या लांबच लांब रांगा लागल्या होत्या. घटनेची माहिती मिळताच पोलिसांनी तातडीने घटनास्थळी धाव घेत वाहतूक नियंत्रणात आणली आणि काही वेळातच वाहतूक सुरळीत करण्यात यश मिळवले.

दरम्यान, महिलेने नदीपात्रात उडी घेतल्याची माहिती मिळताच बचाव आणि शोधमोहीम सुरू करण्यात आली. मात्र, घटनेच्या वेळी अंधार पडल्यामुळे शोधकार्याला मोठा अडथळा निर्माण झाला. नदीपात्रातील कमी दृश्यमानता आणि पाण्याचा प्रवाह यामुळे बचाव पथकासमोर आव्हान उभे राहिले आहे.

महिलेचा शोध घेण्यासाठी स्थानिक ग्रामस्थही मोठ्या संख्येने मदतीला धावून आले आहेत. परिसरातील पट्टीचे पोहणारे नदीपात्रात उतरून महिलेचा शोध घेत आहेत. पोलिसांकडूनही नदीकिनारी आणि पुलाच्या परिसरात शोधमोहीम सुरू ठेवण्यात आली असून उपलब्ध सर्व साधनसामग्रीचा वापर करून महिलेचा माग काढण्याचा प्रयत्न केला जात आहे.

घटनेनंतर पुलावर मोठ्या प्रमाणात नागरिकांची गर्दी झाली होती. त्यामुळे काही काळ वाहतुकीत आणखी अडथळा निर्माण झाला. परिस्थिती नियंत्रणात ठेवण्यासाठी पोलिसांनी गर्दी हटवली आणि वाहनचालकांना पर्यायी नियोजनासह मार्ग मोकळा करून दिला.

सध्या महिलेची ओळख आणि ती पुलावर कशी आली, याबाबतची माहिती गोळा करण्याचे काम सुरू आहे. तसेच तिने नदीत उडी घेण्यामागील कारणांचा शोध पोलिस घेत आहेत. रात्री उशिरापर्यंत शोधमोहीम सुरू होती आणि महिलेचा शोध लागावा यासाठी प्रशासनाकडून प्रयत्न सुरू असल्याची माहिती समोर आली आहे.