नाशिक शहरात डेंग्यूचा प्रादुर्भाव वाढला; महापालिका अलर्ट मोडवर
नाशिक: पावसाळा सुरू होताच नाशिक शहरात डेंग्यूच्या रुग्णसंख्येत मोठी वाढ झाली आहे. मागील आठवड्यात 16 रुग्ण आढळले असून आतापर्यंत 137 रुग्णांची नोंद झाली आहे. यापैकी सध्या 25 रुग्णांवर उपचार सुरू आहेत. ही स्थिती लक्षात घेता महापालिकेचा आरोग्य विभाग सतर्क झाला आहे आणि विशेष उपाययोजना राबवली जात आहेत.
झोपडपट्ट्या, नाले, व जलसाठ्यांची नियमित तपासणी केली जात आहे. तसेच फॉगिंग, औषध फवारणी आणि जनजागृती मोहिमा राबवून नागरिकांना सावधगिरीचे संदेश दिले जात आहेत. डेंग्यूचा प्रसार Aedes नावाच्या मच्छरांमुळे होतो. हे मच्छर सकाळी आणि संध्याकाळी अधिक सक्रिय असतात. स्वच्छ पाण्यात अंडी घालणाऱ्या या मच्छरांपासून बचावासाठी घरात पाणी साचू देऊ नये, असा सल्ला महापालिकेने दिला आहे.
हेही वाचा: सरकारची दुटप्पी भूमिका; जिल्हा रुग्णालयांत मोफत उपचार, पण घाटी रुग्णालयात शुल्कच शुल्क
डेंग्यू झालेला कसा ओळखावा?
डेंग्यूची मुख्य लक्षणं:
- अचानक होणारा ताप
- डोकेदुखी आणि डोळ्यांच्या मागे दुखणे
- सांधेदुखी आणि अंगदुखी
- उलटी किंवा मळमळ
- त्वचेवर लाल चट्टे
- थकवा आणि अशक्तपणा
ही लक्षणं दिसताच डॉक्टरांचा सल्ला घेणे आवश्यक आहे. डेंग्यू ओसरल्यानंतरही प्लेटलेट्स कमी होऊ शकतात, म्हणून नियमित रक्त तपासण्या आवश्यक आहेत.
डेंग्यूपासून बचाव कसा करावा?
- घरात किंवा आजूबाजूला पाणी साचू देऊ नका
- पाण्याच्या टाक्या, ड्रम, कुंड्या झाकून ठेवा
- फुलपात्रं व फ्रिज ट्रे नियमित स्वच्छ करा
- संध्याकाळी आणि सकाळी पूर्ण बाह्यांचे कपडे घाला
- मच्छरदाणी व रिपेलंट्स वापरा
- महापालिकेच्या सूचना पाळा
नागरिकांनी सतर्क राहून स्वच्छतेची काळजी घेतली, तर डेंग्यूचा प्रादुर्भाव रोखता येऊ शकतो. आरोग्य विभाग सातत्याने जनतेसह संपर्कात असून खबरदारी घेण्याचे आवाहन करत आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.