Chhatrapati Sambhajinagar Airport: प्रवाशांनी फिरवली पाठ, इंडिगोची चिंता वाढली! संभाजीनगर-मुंबई विमानसेवा बंद होण्याच्या मार्गावर
छत्रपती संभाजीनगर: छत्रपती संभाजीनगरकरांसाठी महत्त्वाची मानली जाणारी मुंबई विमानसेवा आता अडचणीत सापडल्याचे चित्र आहे. इंडिगोची सायंकाळची विमानसेवा मुंबई विमानतळाऐवजी नवी मुंबई विमानतळावर वळवण्यात आल्यानंतर प्रवाशांचा प्रतिसाद मोठ्या प्रमाणात घटला आहे. त्यामुळे ही सेवा बंद होण्याची शक्यता व्यक्त केली जात आहे.
यापूर्वी इंडिगोकडून छत्रपती संभाजीनगर-मुंबई मार्गावर दोन विमानसेवा सुरू करण्यात आल्या होत्या. उद्योग, व्यापार, प्रशासकीय कामे आणि वैद्यकीय कारणांसाठी मुंबईला जाणाऱ्या प्रवाशांकडून या सेवेला चांगला प्रतिसाद मिळत होता. मात्र, सायंकाळची फ्लाइट नवी मुंबई विमानतळावर हलविल्यानंतर परिस्थिती बदलली.
प्रवाशांच्या म्हणण्यानुसार, नवी मुंबई विमानतळावर उतरल्यावर मुंबई शहरातील विविध भागात पोहोचण्यासाठी अतिरिक्त दोन ते तीन तास खर्च करावे लागतात. त्यामुळे वेळ आणि प्रवासाचा खर्च दोन्ही वाढत असल्याने अनेकांनी या विमानसेवेकडे पाठ फिरवली आहे. परिणामी, या फ्लाइटमधील प्रवाशांची संख्या मोठ्या प्रमाणात कमी झाली असून काही दिवसांमध्ये ती दोन आकडी संख्येपर्यंत खाली आल्याचे सांगितले जात आहे.
प्रवासीसंख्या सातत्याने घटत असल्याने इंडिगोकडून या मार्गावरील सेवा कायमस्वरूपी बंद करण्याचा विचार सुरू असल्याची माहिती समोर येत आहे. यामुळे छत्रपती संभाजीनगरमधील उद्योगपती, व्यापारी, लोकप्रतिनिधी आणि नियमित प्रवास करणाऱ्या नागरिकांमध्ये चिंता व्यक्त केली जात आहे.
प्रवाशांनी ही सेवा पूर्वीप्रमाणे मुंबईच्या मुख्य विमानतळावरूनच सुरू ठेवण्याची मागणी केली आहे. मुंबई विमानतळावर थेट उतरत असल्यामुळे शहरातील विविध भागांमध्ये पोहोचणे सोपे आणि वेळेची बचत होत होती. नवी मुंबई विमानतळावर स्थलांतरानंतर ही सुविधा कमी झाल्याचे प्रवाशांचे म्हणणे आहे.
दरम्यान, विमानसेवा कायम ठेवण्यासाठी आणि प्रवाशांचा प्रतिसाद पुन्हा वाढवण्यासाठी संबंधित यंत्रणांनी यावर तातडीने निर्णय घ्यावा, अशी मागणी जोर धरू लागली आहे. अन्यथा छत्रपती संभाजीनगर-मुंबई या महत्त्वाच्या हवाई मार्गावरील आणखी एक सेवा बंद होण्याची शक्यता नाकारता येत नाही.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.