BJP Party : दिल्लीच्या तख्तावर नबीन, तर मैदानात महाराष्ट्राचे वाघ; विनोद तावडे आणि आशिष शेलार यांचे राष्ट्रीय राजकारणात प्रमोशन
नवी दिल्ली: भाजपच्या नव्या पर्वाला सुरुवात झाली असून, अत्यंत तरुण आणि तडफदार नेतृत्व म्हणून ओळखले जाणारे नितीन नबीन (Nitin Nabin) यांची अखेर भाजपच्या राष्ट्रीय अध्यक्षपदी बिनविरोध निवड करण्यात आली आहे. 16 जानेवारीपासून सुरू झालेल्या या निवडणूक प्रक्रियेत नबीन यांनी 37 सेटसह समर्थनाचे मोठे बळ मिळवत अध्यक्षपदाची धुरा आपल्या खांद्यावर घेतली. 45 वर्षीय नबीन हे भाजपच्या इतिहासातील सर्वात तरुण अध्यक्ष ठरले असून, त्यांच्या निवडीनंतर पक्षाने आता थेट आगामी निवडणुकांचे रणशिंग फुंकले आहे.
महाराष्ट्राच्या नेत्यांचे राष्ट्रीय राजकारणात वाढते वजन
नितीन नबीन यांनी अध्यक्षपदाची सूत्रे हाती घेताच जो पहिला आणि धडाकेबाज निर्णय घेतला, त्यामध्ये महाराष्ट्राच्या राजकारणातील दोन दिग्गज नेत्यांना, विनोद तावडे आणि आशिष शेलार यांना मोठी राष्ट्रीय जबाबदारी सोपवण्यात आली आहे. भाजपच्या या नव्या रणनीतीमुळे राष्ट्रीय स्तरावर ‘महाराष्ट्र एक्स्प्रेस’चा वेग वाढल्याचे स्पष्ट संकेत मिळत आहेत. आगामी विधानसभा आणि स्थानिक स्वराज्य संस्थांच्या निवडणुकांमध्ये ‘महाराष्ट्राचा पॅटर्न’ राबवण्याची ही एक मोठी चाणक्यनीती असल्याचे राजकीय विश्लेषकांचे मत आहे.
विनोद तावडे; ‘मिशन केरळ’चे नवे सारथी
पक्षाचे राष्ट्रीय सरचिटणीस विनोद तावडे यांच्यावर नबीन यांनी मोठा विश्वास दाखवला आहे. तावडे यांची केरळ विधानसभा निवडणुकीसाठी प्रभारी म्हणून नियुक्ती करण्यात आली आहे. केरळमध्ये पक्षाचा पाया विस्तारणे हे भाजपसाठी नेहमीच एक आव्हान राहिले आहे; अशा कठीण परिस्थितीत तावडेंच्या संघटनात्मक कौशल्याची कसोटी लागणार आहे. त्यांच्या जोडीला केंद्रीय मंत्री शोभा करंदलाजे यांची सहप्रभारी म्हणून निवड करण्यात आली आहे. इतकेच नव्हे, तर चंदीगड महापौर निवडणुकीसाठीही तावडे यांच्यावर प्रभारी म्हणून अतिरिक्त जबाबदारी सोपवून त्यांच्या ‘ट्रबल शूटर’ प्रतिमेवर शिक्कामोर्तब केले आहे.
तेलंगणाच्या मैदानात आशिष शेलारांचा ‘मुंबई पॅटर्न’
दुसरीकडे, भाजपचे अनुभवी नेते आशिष शेलार यांच्यावर दक्षिणेतील महत्त्वाच्या अशा तेलंगणा राज्यातील स्थानिक स्वराज्य संस्थांच्या निवडणुकीची जबाबदारी सोपवण्यात आली आहे. मुंबईसारख्या महानगरातील राजकारण आणि निवडणुकांचा दांडगा अनुभव असलेले शेलार आता तेलंगणाच्या स्थानिक राजकारणात भाजपचा झेंडा फडकवण्यासाठी मैदानात उतरणार आहेत. ‘दक्षिणेचे द्वार’ मानल्या जाणाऱ्या तेलंगणात शेलारांची आक्रमक शैली पक्षाला किती यश मिळवून देते, याकडे सर्वांचे लक्ष लागले आहे.
बेंगळुरू आणि चंदीगड; निवडणुकांचे नियोजन
नव्या अध्यक्षांच्या या पहिल्या निर्णयात केवळ महाराष्ट्रच नव्हे, तर दक्षिण आणि उत्तर भारतातील सत्तेचे समीकरण जुळवण्याचा प्रयत्न दिसून येतो. बेंगळुरू महापौर निवडणुकीसाठी राम माधव, सतीश पुनिया आणि संजय उपाध्याय यांच्यासारख्या अनुभवी नेत्यांची फळी तैनात करण्यात आली आहे. स्थानिक स्वराज्य संस्थांपासून ते विधानसभा निवडणुकांपर्यंत भाजप आपली पकड घट्ट करण्यासाठी आत्तापासूनच मैदानी कामाला लागल्याचे या नियुक्त्यांवरून स्पष्ट होत आहे.
निर्णायक वाटचाल: मिशन 2029 कडे पहिले पाऊल
नितीन नबीन यांच्या नेतृत्वाखालील या नव्या टीमने पदभार स्वीकारताच कामाचा धडाका लावला आहे. महाराष्ट्रातील तावडे आणि शेलार यांच्यासारख्या वजनदार नेत्यांना महत्त्वाच्या राज्यांची सूत्रे देऊन, भाजपने आगामी 2029 च्या लोकसभा निवडणुकीची पूर्वतयारीच जणू सुरू केली आहे. “जबाबदारी मोठी, पण विजय निश्चित” या धोरणाने प्रेरित होऊन ही नवी टीम आता मैदानात उतरली असून, आगामी काळात हे बदल भाजपला किती यश मिळवून देतात, हे पाहणे औत्सुक्याचे ठरेल.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.