Samay Raina And Devendra Fadnavis Video: ‘मी हे बिस्कीट घेऊ?’ समय रैनाने असं काही केलं की मुख्यमंत्र्यांनाही हसू आवरेना; पाहा मजेशीर Video

मुंबई: मुंबईत झालेल्या एका कार्यक्रमात मुख्यमंत्री देवेंद्र फडणवीस आणि कॉमेडियन समय रैना यांच्यातील छोटासा संवाद उपस्थितांच्या चांगलाच लक्षात राहिला. ‘डिजिटल अरेस्ट’सारख्या गंभीर विषयावर जनजागृती करण्यासाठी आयोजित कार्यक्रमात समयच्या एका साध्या प्रश्नामुळे वातावरण काही क्षणांसाठी हलकंफुलकं झालं.

‘ऑपरेशन 1930’ या सायबर जनजागृती चित्रपटाच्या ट्रेलरचे तसेच ‘1930 सायबर अँथम’चे अनावरण 26 ऑगस्ट रोजी करण्यात आले. या कार्यक्रमाला मुख्यमंत्री देवेंद्र फडणवीस यांच्यासह राज्यमंत्री डॉ. पंकज भोयर, अभिनेते शरद केळकर, जावेद जाफरी, आशिष विद्यार्थी, पंकज त्रिपाठी, सोनाली बेंद्रे, अभिषेक बॅनर्जी, मंगेश देसाई, गायिका सुनिधी चौहान आणि कॉमेडियन समय रैना यांच्यासह अनेक मान्यवर उपस्थित होते.

कार्यक्रमादरम्यान समय रैनाचा सत्कार करण्यात आला. सत्कारासाठी तो मुख्यमंत्री फडणवीस यांच्याजवळ गेला. त्यावेळी समोर ठेवलेल्या बिस्किटांकडे त्याचे लक्ष गेले. अचानक त्याने फडणवीसांकडे बिस्किट घेण्याची परवानगी मागितली. मुख्यमंत्र्यांनीही हसत त्याला होकार दिला. त्यानंतर समयने बिस्किट घेतले आणि आपल्या जागेवर परतला.

या छोट्याशा प्रसंगामुळे फडणवीसांसह कार्यक्रमातील उपस्थितांमध्ये हशा पिकला. गंभीर विषयावरील कार्यक्रमात घडलेला हा अनपेक्षित क्षण सोशल मीडियावरही चर्चेचा विषय ठरला आहे.

दरम्यान, समय रैनाने आपल्या सोशल मीडिया अकाउंटवर या कार्यक्रमातील व्हिडीओ शेअर केला आहे. त्यामध्ये त्याने ‘महाराष्ट्र सायबर’सोबतच्या आपल्या संबंधांबद्दलही भाष्य केले. सायबर गुन्ह्यांविरोधात काम करणाऱ्या यंत्रणेच्या सक्रियतेचे त्याने कौतुक केले.

समयने 1930 या हेल्पलाइन क्रमांकाचाही आपल्या खास विनोदी शैलीत उल्लेख केला. हा क्रमांक त्याने आपल्या फोनमध्ये सेव्ह करून ठेवल्याचे सांगताना त्याच क्रमांकावरून आपल्याला अनेकदा फोन येत असल्याचे त्याने मिश्कीलपणे म्हटले. त्याच्या या वक्तव्यानंतर उपस्थितांमध्ये पुन्हा हशा पिकला.

The way Samay Raina is requesting biscuits from CM Devendra Fadnavis. ? pic.twitter.com/ZAQ6a7RcoF — Sonu (@Cricket_live247) August 27, 2026

‘ऑपरेशन 1930’च्या माध्यमातून डिजिटल अरेस्ट आणि सायबर फसवणुकीबाबत नागरिकांमध्ये जागरूकता निर्माण करण्याचा प्रयत्न करण्यात येत आहे. ऑनलाइन फसवणुकीचे प्रकार वाढत असताना नागरिकांनी अनोळखी फोन, संदेश किंवा धमक्यांना घाबरून आर्थिक व्यवहार करू नयेत, याबाबत जनजागृती करणे हा अशा उपक्रमांचा महत्त्वाचा उद्देश आहे.

एकीकडे सायबर गुन्ह्यांसारख्या गंभीर विषयावर चर्चा सुरू असताना समय रैनाच्या विनोदी अंदाजामुळे कार्यक्रमातील वातावरण काही काळासाठी आनंदी झाले. त्याचा बिस्किट मागतानाचा प्रसंग आणि त्यानंतरचा संवाद आता सोशल मीडियावर लक्ष वेधून घेत आहे. विशेष म्हणजे, समयच्या या मिश्कील शैलीमुळे गंभीर विषयावरील कार्यक्रमातील एक हलकाफुलका क्षण कॅमेऱ्यात कैद झाला असून त्याचीच सर्वत्र चर्चा होत आहे.