Twisha Sharma Death : ‘जबर मार लागल्याच्या अनेक जखमा’; ट्विशा शर्माच्या शवविच्छेदन अहवालातून धक्कादायक खुलासा

भोपाळ : भोपाळमध्ये संशयास्पद परिस्थितीत मृत्यू पावलेल्या नोएडा येथील 33 वर्षीय ट्विशा शर्माच्या शवविच्छेदनातून मृत्यूपूर्व अवस्थेत गळफास घेतल्याने तिचा मृत्यू झाल्याची माहिती समोर आली आहे. एम्स भोपाळ येथील न्यायवैद्यकशास्त्र आणि विषविज्ञान विभागात करण्यात आलेल्या शवविच्छेदनात, तिच्या शरीरावर इतर ठिकाणीही अनेक ठिकाणी जबर मार लागल्याच्या जखमा आढळून आल्या आहेत.

अहवालानुसार, 12 मे रोजी रात्री सुमारे 10.26 वाजता शर्मा तिच्या निवासस्थानाच्या गच्चीवर जिम्नॅस्टिक रिंगच्या दोरीला लटकलेल्या अवस्थेत आढळली. तर 13 मे रोजी मध्यरात्रीनंतर तिला मृत घोषित करण्यात आले. तिने डिसेंबर 2025 मध्ये भोपाळचा रहिवासी समर्थ सिंग याच्याशी लग्न केले होते. तिच्या कुटुंबीयांनी सतत मानसिक छळ आणि हुंड्याशी संबंधित अत्याचाराचा आरोप केला आहे.

मिळालेल्या माहितीनुसार, शवविच्छेदन अहवालात शर्मा यांच्या मानेच्या वरच्या एक-तृतीयांश भागाभोवती तिरकसपणे पसरलेल्या लालसर नक्षीदार दुहेरी फासाच्या खुणांची नोंद आहे. त्या खुणेखालील त्वचा कोरडी, कठीण आणि "चर्मपत्रासारखी" असल्याचे वर्णन केले गेले होते. तर मानेच्या मागच्या बाजूला ती खूण अपूर्ण आढळली. डॉक्टरांनी गुदमरल्याच्या लक्षणांचीही नोंद केली. ज्यात चेहऱ्यावर सूज, कान आणि नखांचा निळसर रंग आणि उजव्या डोळ्यात पेटीशियल रक्तस्राव यांचा समावेश होता.

हेही वाचा : Ulhasnagar Love Jihad: इमरान बनला विजय, लग्नानंतर दाखवले खरे रंग; बुरखा, हिजाब, गोमांसासाठी दबाव… उल्हासनगरमधील ‘लव्ह जिहाद’ प्रकरणाने खळबळ

अहवालात पुढे नमूद केले आहे की, अंतर्गत तपासणीत गळफासाच्या खुणेखालील ऊतींमध्ये दोन लहान जखमेचे व्रण आढळून आले. फुफ्फुसांमध्ये टार्डियू स्पॉट्स (Tardieu's spots) आढळले. जे सामान्यतः गुदमरण्याशी संबंधित एक वैशिष्ट्य आहे. तर मेंदू, फुफ्फुसे आणि पोटाच्या अस्तरामध्ये रक्तसंचय देखील नोंदवला गेला. अहवालानुसार, फाशीशी संबंधित निष्कर्षांव्यतिरिक्त, शवविच्छेदनात शरीरावर मृत्यूपूर्व काळात झालेल्या अनेक बोथट आघातांच्या जखमांची नोंद झाली. यामध्ये मानेच्या डाव्या बाजूला ओरखडे, डाव्या दंडावर, डाव्या हाताच्या कोपरापासून मनगटापर्यंत, उजव्या मनगटावर आणि उजव्या अनामिकेवर जखमा, तसेच डाव्या फ्रंटोपॅरिएटल प्रदेशात टाळूखाली 2 सेमी x 2 सेमी आकाराची जखम यांचा समावेश होता. वैद्यकीय मंडळाने असा निष्कर्ष काढला की, जरी फाशी हे मृत्यूचे कारण असले तरी, इतर जखमा बोथट आघातामुळे झालेल्या साध्या मृत्यूपूर्व जखमा असल्याचे दिसून आले.

अहवालात पुढे नमूद केले आहे की, शर्मा यांचे गर्भाशय मोठे झाले होते आणि त्यात लालसर-राखाडी रंगाचे ठिसूळ ऊतक होते. जे गर्भाशयात डेसिड्युअल ऊतक शिल्लक राहिल्याचे सूचित करते. तिच्या मृत्यूच्या एक आठवडा आधी वैद्यकीय गर्भपात (MTP) करण्यात आल्याची नोंद त्यात आहे. नशेची शक्यता नाकारण्यासाठी आणि पुढील तपासात मदत करण्यासाठी रक्त, अंतर्गत अवयव, नखांचे तुकडे आणि केसांसह नमुने जतन करून विषशास्त्र आणि डीएनए विश्लेषणासाठी न्यायवैद्यक विज्ञान प्रयोगशाळेत पाठवण्यात आले आहेत.

तपासात या प्रकरणातील मुख्य आरोपी समर्थ सिंगच्या अटकेसाठी माहिती देणाऱ्यास 10 हजार रुपयांचे बक्षीस जाहीर करण्यात आले आहे. अहवालात सहाय्यक पोलीस आयुक्त रजनीश कश्यप कौल यांच्या हवाल्याने म्हटले आहे की, लुकआऊट नोटीसच्या संदर्भात डीसीपी कार्यालय, भोपाळ आयुक्तालय आणि प्रादेशिक पासपोर्ट कार्यालयाशी आवश्यक पत्रव्यवहार सुरू करण्यात आला आहे. ते म्हणाले की, एसआयटी तांत्रिक आणि इतर दोन्ही माध्यमांतून सक्रियपणे गुप्त माहिती गोळा करत आहे.

हेही वाचा : LeT Terrorist Arrest: हेअर ट्रान्सप्लांट अन् दातांचे उपचार… लष्कर-ए-तोयबाच्या दहशतवाद्यांना मेकओव्हर पडला महागात; सुरक्षा यंत्रणांनी केलं गजाआड

शर्मा यांच्या सासू, निवृत्त न्यायाधीश गिरीबाला सिंग यांनी मृत्यूपूर्वीच्या घटनांबद्दल सार्वजनिक विधान केल्यानंतर या प्रकरणाला नवीन वळण लागले. अहवालात त्यांच्या हवाल्याने म्हटले आहे की, 17 एप्रिल रोजी ट्विशाला गर्भधारणा झाल्याची पुष्टी मिळताच, तिचा संपूर्ण स्वभाव बदलला आणि तिने ते बाळ ठेवायचे नाही, असे जाहीर केले. पुढे असेही म्हटले आहे की, त्यानंतर ट्विशाने एमटीपी (MTP) करून घेतली.