धनंजय मुंडेंना कार्यमुक्त केले - देवेंद्र फडणवीस
मुंबई: राज्याचे अन्न व नागरी पुरवठा मंत्री धनंजय मुंडे यांनी आपल्या पदाचा राजीनामा दिला असून, तो मुख्यमंत्री देवेंद्र फडणवीस यांनी स्वीकारला आहे. पुढील कारवाईसाठी हा राजीनामा राज्यपालांकडे पाठवण्यात आला आहे. मुख्यमंत्र्यांनी स्पष्ट केले की, धनंजय मुंडेंना कार्यमुक्त करण्यात आले आहे.
बीड जिल्ह्यातील मस्साजोग गावचे सरपंच संतोष देशमुख यांच्या निर्घृण हत्येचे फोटो सोशल मीडियावर व्हायरल झाल्यानंतर राज्यभरात मोठ्या प्रमाणावर संताप व्यक्त करण्यात आला. याच पार्श्वभूमीवर सोमवारी सायंकाळी मुख्यमंत्र्यांनी देवगिरी बंगल्यावर धनंजय मुंडेंची बैठक घेतली. या बैठकीत त्यांना राजीनामा देण्याचे आदेश देण्यात आले होते. त्यानुसार, धनंजय मुंडेंनी आज आपल्या PA आणि OSDच्या मार्फत आपला राजीनामा मुख्यमंत्र्यांकडे सुपूर्द केला, जो तत्काळ स्वीकारण्यात आला.
राजकीय उलथापालथ आणि मुख्यमंत्र्यांचा निर्धार
मुख्यमंत्री देवेंद्र फडणवीस यांनी या प्रकरणाची गंभीर दखल घेतली होती. बैठकीत त्यांनी स्पष्टपणे सांगितले की, संतोष देशमुख हत्या प्रकरणामुळे राज्य सरकारवर मोठा दबाव येत आहे. त्यामुळे मुंडेंनी तातडीने राजीनामा द्यावा, असा स्पष्ट आदेश त्यांनी दिला होता.
सुरुवातीला धनंजय मुंडे यांनी राजीनामा देण्यास अनिच्छा दर्शवली होती. मात्र, या प्रकरणामुळे राजकीय आणि सामाजिक दबाव वाढल्याने अखेर त्यांना आपल्या पदाचा राजीनामा द्यावा लागला. देवगिरी बंगल्यावर झालेल्या बैठकीत उपमुख्यमंत्री अजित पवार, प्रफुल्ल पटेल आणि इतर वरिष्ठ नेते उपस्थित होते. या चर्चेनंतर धनंजय मुंडेंनी राजीनामा देण्याचा निर्णय घेतला.
संतोष देशमुख हत्या प्रकरण आणि बीड बंद
सरपंच संतोष देशमुख यांच्या हत्येच्या निषेधार्थ मराठा समाज आणि व्यापाऱ्यांनी बीड जिल्हा बंदची हाक दिली आहे. शहरातील प्रमुख बाजारपेठा आणि सुभाष रोडवरील दुकाने बंद राहिली असून व्यापारीही उस्फूर्तपणे या आंदोलनात सहभागी झाले आहेत.
संतोष देशमुख यांची अमानुष हत्या झाल्याने संपूर्ण मराठा समाजात संतापाची लाट उसळली आहे. त्यांच्या कुटुंबीयांसह अनेक संघटनांनी या घटनेचा तीव्र निषेध केला आहे. यामुळे धनंजय मुंडेंच्या अडचणी वाढल्या असून, त्यांच्यावर राजकीय आणि सामाजिक स्तरावर मोठा दबाव निर्माण झाला होता.महाराष्ट्राच्या राजकारणावर परिणाम
धनंजय मुंडेंच्या राजीनाम्यानंतर महाराष्ट्राच्या राजकारणात मोठे वादळ उठण्याची शक्यता आहे. त्यांच्या जागी नवीन मंत्र्याची नियुक्ती कधी होणार, याकडे सर्वांचे लक्ष लागले आहे. या घटनेचा राज्यातील सत्तासमीकरणांवरही मोठा परिणाम होईल, अशी शक्यता वर्तवली जात आहे.