ठाणे, ०८ फेब्रुवारी २०२४, प्रतिनिधी : घोडबंदर रोडवर अवजड वाहनांच्या अपघातांची मालिका रोखण्यासाठी सार्वजनिक बांधकाम विभाग आणि ठाणे पालिका प्रशासनाने स्टॉपर, दिशादर्शक फलकांच्या उपाययोजना केल्या आहेत. त्यानुसार उड्डाणपुलांच्या सुरुवातीला स्टॉपर आणि पुलांच्या काही मीटर अंतरावरच दिशादर्शक फलकांवर सूचना प्रदर्शित केल्याने भविष्यात या ‘ब्लॅकस्पॉट’वरील अपघात रोखण्यास मदत होणार आहे. गेल्या महिनाभरात घोडबंदर रोडवर चार भीषण अपघात घडल्याने प्रशासनाचेही धाबे दणाणले होते. ठाणे पालिका आयुक्त अभिजित बांगर यांनीही या अपघातांबाबत चिंता व्यक्त करत प्रशासनाला अपघात रोखण्यासाठी उपाययोजना करण्याच्या सूचना दिल्या होत्या.
ठाण्याहून घोडबंदरच्या दिशेने जाणारा अवजड कंटेनर गेल्या महिन्यात पातलीपाडा पुलाच्या चढणीवर पहाटे उलटला. या अपघातानंतर कंटेनरला आग लागली होती. आगीच्या भडक्यात चालकाचा होरपळून मृत्यू झाला होता. याच पुलाशेजारील मार्गिकेवर याआधी गेल्या वर्षी २८ डिसेंबरला तेलाचा टँकर उलटला होता. तसेच अशाच पद्धतीने २९ डिसेंबरला वाघबीळ उड्डाणपुलाशेजारील मार्गिकेवर कापडाची वाहतूक करणारा ट्रक उलटला होता. या अपघातांमुळे घोडबंदर रोडवर होणाऱ्या कोंडीचा फटका नोकरदारांना बसतो. तसेच अपघातात वित्त आणि जीवितहानी होते. त्यामुळे हे अपघात रोखण्यासाठी सार्वजनिक बांधकाम विभागाने पातलीपाडा, वाघबीळ उड्डाणपुलाआधी ‘स्टॉपर’ लावले आहेत. अवजड वाहनचालकांना काही मीटर अंतरावरूनच हे स्टॉपर निदर्शनास येताच, त्यांना उड्डाणपूल आणि त्याखालील मार्गिकेचा अंदाज येणार आहे. त्यामुळे वाहनचालक सतर्क होऊन अपघात टळेल. तसेच ठाणे पालिकेच्या वतीने घोडबंदर रोडवरील प्रत्येक पुलाआधी १०० ते १५० मीटर अंतरावर दोन्ही मार्गिकांच्या मधील दुभाजकावर ‘पुढे उड्डाणपूल आहे’ असे फलक दर्शवण्यात आले आहेत. मराठी व इंग्रजी दोन्ही भाषेत लावलेले हे फलक रात्रीच्या अंधारात चमकत असल्याने चालक अधिक सतर्क होऊन वाहने चालवतील, असे अधिकाऱ्यांनी सांगितले.
‘स्टॉपर’ला धडकल्यास वेगावर नियंत्रण
पुलांच्या चढणीवर कठड्याआधी स्टॉपर उभारल्याने वाहने त्यावर धडकल्यास त्यांच्या वेगावर नियंत्रण राहील. त्यामुळे अपघातांनाही आळा बसेल. पर्यायाने जीवितहानी आणि वित्तहानी टाळता येणार असल्याचे ठाणे वाहतूक शाखेच्या अधिकाऱ्यांनी सांगितले. या उपाययोजनांसाठी वाहतूक शाखेनेही संबंधित यंत्रणांशी पत्र व्यवहार केला होता.