भारतीय शेअर बाजार सध्या मोठ्या चढ-उताराच्या टप्प्यातून जात आहे. मागील काही महिन्यांत बाजाराने मोठी घसरण पाहिली, मात्र गेल्या तीन दिवसांपासून तेजी दिसून आली आहे. अशा अस्थिर स्थितीत गुंतवणूकदारांच्या नजरा दोन महत्त्वाच्या घटनांकडे लागल्या आहेत—केंद्रीय अर्थसंकल्प 2025 आणि रिझर्व्ह बँकेच्या (RBI) चलनविषयक धोरण समितीची (MPC) बैठक. उच्च मूल्यांकन, परदेशी संस्थात्मक गुंतवणूकदारांची (FIIs) विक्री, जागतिक अर्थव्यवस्थेतील आव्हाने आणि कंपन्यांच्या कमकुवत उत्पन्नाचा परिणाम बाजाराच्या अस्थिरतेवर झाला आहे. बीएसई 500 निर्देशांकातील 400 हून अधिक शेअर्स मंदीत सापडले असून, 95 शेअर्समध्ये 40% किंवा अधिक घसरण झाली आहे. यामध्ये SPARC चे शेअर्स सर्वाधिक 65% पडले आहेत, तर अनेक मोठे स्टॉक्सही मोठ्या घसरणीला सामोरे गेले आहेत.

गुंतवणूकदारांसाठी ही स्थिती चिंताजनक असली, तरी अर्थसंकल्प आणि RBI धोरण समितीच्या निर्णयानंतर बाजाराला नवीन दिशा मिळू शकते. १ फेब्रुवारीला सादर होणाऱ्या अर्थसंकल्पात सरकारकडून प्रोत्साहनपर उपाययोजना आणि गुंतवणुकीला चालना देणाऱ्या घोषणा अपेक्षित आहेत. RBI च्या फेब्रुवारीच्या बैठकीत व्याजदर कपातीबाबत मोठे निर्णय घेतले जाऊ शकतात, जे बाजारासाठी सकारात्मक ठरू शकते. याशिवाय, जागतिक बाजारपेठांतील हालचाली, अमेरिका आणि युरोपमधील आर्थिक धोरणे तसेच फेडरल रिझर्व्हच्या पुढील निर्णयांचा भारतीय शेअर बाजारावर थेट परिणाम होणार आहे.

हेही वाचा: डोनाल्ड ट्रम्प आयकर रद्द करणार? देश चालवण्यासाठी 'या' देशांवर करणार वसुली!"

सेन्सेक्सने 12% घसरण अनुभवली असली तरी दीर्घकालीन गुंतवणूकदारांसाठी ही संधी ठरू शकते. बाजारात स्थिरता येण्यासाठी सरकार आणि RBI कडून स्पष्ट दिशानिर्देश अपेक्षित आहेत. मोठ्या अस्थिरतेच्या पार्श्वभूमीवर अनुभवी गुंतवणूकदार निवडक मजबूत शेअर्समध्ये खरेदी करत आहेत. त्यामुळे येत्या काही दिवसांत बाजाराची चाल अर्थसंकल्प आणि RBI च्या धोरणांवर अवलंबून राहील. गुंतवणूकदारांनी घाईगडबडीत निर्णय घेण्यापेक्षा, महत्त्वाच्या घोषणांची वाट पाहणे अधिक शहाणपणाचे ठरेल!

जय महाराष्ट्र न्यूजच्या थेट संपर्कात राहण्यासाठी व्हॉट्सअप चॅनेल वर क्लिक करा.