नवी दिल्ली: भारतात लुलू ग्रुप मोठी गुंतवणूक करणार आहे. लुलू ग्रुप इंटरनॅशनल (LGI) चे मुख्यालय संयुक्त अरब अमिराती (UAE) ची राजधानी अबू धाबी येथे आहे. हा समूह पुढील चार-पाच वर्षांत भारतात 5 हजार कोटी रुपयांची गुंतवणूक करणार आहे. यामुळे सुमारे 15 हजार रोजगाराच्या संधी निर्माण होण्याची अपेक्षा आहे. लुलु ग्रुपने नुकताच नागपूर येथेही प्रवेश केला आहे. येथील लुलु मॉलचे काम सुरुवातीच्या टप्प्यात आहे.

लुलू ग्रुप इंटरनॅशनलचे कार्यकारी संचालक एम. ए, अशरफ अली यांनी गेल्या शनिवारी 'इन्व्हेस्ट केरळ ग्लोबल समिट' (आयकेजीएस) दरम्यान ही घोषणा केली. ते म्हणाले, "ही गुंतवणूक प्रामुख्याने अन्न प्रक्रिया, जागतिक शहर प्रकल्प आणि आयटी पार्कमध्ये असेल. त्याची संपूर्ण योजना अद्याप तयार केली जात आहे." या संदर्भात राज्याचे उद्योग मंत्री पी. राजीव यांच्याशी चर्चा झाल्याचे त्यांनी सांगितले.

हेही वाचा - Damaged Notes from ATM : एटीएम मधून फाटकी नोट मिळाली तर काय करायचं? काय आहे RBI चा नियम?

20 एकर जागेत अन्न प्रक्रिया क्षेत्र बांधले जाईल
ते म्हणाले की, प्रस्तावित अन्न प्रक्रिया क्षेत्र कलामसेरीमध्ये 20 एकर क्षेत्रात बांधले जाईल. तेथे फळे आणि भाज्यांवर प्रक्रिया केली जाईल. राज्य सरकारने कोची येथे प्रस्तावित केलेल्या ग्लोबल सिटी प्रकल्पात लुलू ग्रुप आयटी आणि फिनटेक क्षेत्रातही गुंतवणूक करेल. अली म्हणाले, "अन्न प्रक्रिया क्षेत्रात मोठे शीतगृह असतील. केरळ आणि तामिळनाडूमधून फळे आणि भाज्या गोळा केल्या जातील आणि कोची विमानतळावर पाठवल्या जातील. येथून, त्यांच्यापासून नवीन उत्पादने बनवली जातील आणि इतर देशांमध्ये विकली जातील."
लुलू ग्रुप केरळमध्ये सुमारे 5 हजार कोटी रुपयांची गुंतवणूक करत आहे. ही गुंतवणूक अन्न प्रक्रिया, पायाभूत सुविधा, फिनटेक इत्यादी क्षेत्रात असेल. यामुळे राज्यातील सुमारे 15 हजार लोकांना रोजगार मिळण्याची शक्यता आहे.

केरळमध्ये लुलू ग्रुपचे अनेक प्रकल्प
लुलू ग्रुप इंटरनॅशनल कोची येथील इन्फोपार्क येथे दोन आयटी टॉवर्स उभारत आहे. हे टॉवर तीन महिन्यांत काम सुरू करतील असे सांगितले जात आहे. किरकोळ क्षेत्रात, कंपनी पेरिंथलमन्ना, तिरुर, कन्नूर, कासारगोड आणि त्रिसूर येथे छोटे शॉपिंग मॉल विकसित करत आहे. केरळनंतर देशातील इतर भागांतही हा उद्योग विस्तारण्याची शक्यता आहे. यापूर्वी लुलु ग्रुपचे तेलंगणातील हैदराबाद आणि उत्तर प्रदेशातील लखनऊ येथे मॉल आहेत. यापूर्वी कंपनीचे व्यवस्थापक एम. ए. युसूफ अली यांनी आंध्र प्रदेशचे मुख्यमंत्री चंद्राबाबू नायडू यांचीही भेट घेतली होती.

हेही वाचा - Smartphone Export : भारतातून 1.55 लाख कोटींच्या स्मार्टफोन्सची निर्यात; 10 महिन्यांच्या आत 140 टक्क्यांनी वाढ