छत्रपती संभाजीनगर, २३ मार्च २०२४, प्रतिनिधी : छत्रपती संभाजीनगर जिल्ह्यातील दोन तालुक्यांत १८ मंडलात तीव्र दुष्काळ जाहीर करण्यात आला. शिवाय ५० मंडलामध्ये दुष्काळसदृश स्थिती आहे. या मंडलातील गावांमध्ये दुष्काळाच्या उपाययोजना व सवलती लागू करण्याचे आदेश जिल्हाधिकारी दिलीप स्वामी यांनी दिले आहेत. जिल्ह्यातील छत्रपती संभाजीनगर व सोयगाव तालुक्यात दुष्काळी परिस्थितीच्या पार्श्वभूमीवर प्रत्यक्ष पिकांच्या नुकसानीचे सर्वेक्षण करण्यात आले. त्यानुसार छत्रपती संभाजीनगर तालुक्यात १४ तर सोयगाव तालुक्यात ४ अशा १८ महसुली मंडळांत गंभीर स्वरूपाचा दुष्काळ जाहीर करण्यात आला. जिल्ह्यातील अन्य तालुक्यातील ५० महसूल मंडलामध्ये दुष्काळ सदृश परिस्थिती जाहीर करण्यात आली आहे.