पुणे, १२ मार्च २०२४, प्रतिनिधी : पुणे मेट्रोच्या पहिल्या टप्प्यातील वनाझ कॉर्नर ते रामवाडी दरम्यानची मेट्रो मार्गिका कार्यान्वित झाल्यानंतर आता रामवाडी ते वाघोली (११.६३ किलोमीटर) आणि वनाझ ते चांदणी चौक (१.१२ किलोमीटर) या दोन्ही बाजूंच्या मार्गविस्तारास राज्य सरकारने सोमवारी मंजुरी दिली. यामुळे भविष्यात चांदणी चौकातून थेट वाघोलीपर्यंतचा प्रवास मेट्रोने करणे शक्य होणार आहे.
‘टप्पा-१’मधील एक मार्गिका पूर्ण कार्यान्वित झाल्यानंतर पुणेकरांना मेट्रोच्या विविध भागांत विस्ताराचे वेध लागले आहेत. पिंपरी ते निगडी दरम्यानच्या मेट्रो विस्ताराचे भूमिपूजन गेल्याच आठवड्यात झाले असताना, वनाझ ते रामावडी या ‘मार्गिका-२’च्या विस्तारावर राज्य सरकारने सोमवारी शिक्कामोर्तब केले. वनाझ ते चांदणी चौक या मार्गिकेवर दोन आणि रामवाडी ते वाघोली दरम्यानच्या मार्गिकेवर ११ स्थानके बांधण्यात येणार आहेत. संपूर्ण उन्नत स्वरूपातील या विस्तारित मार्गिकांसाठी ३७५६ कोटी रुपये खर्च अपेक्षित आहे.
पुढील प्रवास कसा?
राज्य सरकारच्या नगरविकास विभागामार्फत दोन्ही मार्गांचा प्रस्ताव केंद्र सरकारला सादर केला जाणार
केंद्र सरकारच्या गृहनिर्माण आणि नागरी व्यवहार मंत्रालयाकडून विविध खात्यांचा अभिप्राय घेतला जाणार
सर्व खात्यांचा अभिप्राय प्राप्त झाल्यानंतर सार्वजनिक गुंतवणूक मंडळासमोर (पीआयबी) हा प्रस्ताव सादर होणार
‘पीआयबी’च्या मान्यतेनंतर केंद्रीय मंत्रिमंडळाची मान्यता आवश्यक
केंद्रीय मंत्रिमंडळाच्या मान्यतेनंतर निविदा काढून या मार्गाचे प्रत्यक्ष काम सुरू केले जाणार