प्रतिनिधी, मुंबई, दि. २५ फेब्रुवारी २०२४ : मेट्रो ३ या भूमिगत मार्गिकेला विलंब झाला आहे, अशी कबुली ही मार्गिका उभी करणाऱ्या मुंबई मेट्रो रेल कॉर्पोरेशनने (एमएमआरसी) दिली आहे. मार्गिकेला नव्या कालमर्यादेनुसार आता अधिकाधिक सव्वा महिन्यांचाच कालावधी शिल्लक असताना अद्याप चाचणी न झाल्याने विलंब झाला आहे.
मेट्रो ३ ही जवळपास ३३ किमी लांबीची भूमिगत मार्गिका आहे. एकूण २७ स्थानकांच्या या मार्गिकेचा दहा स्थानकांचा पहिला टप्पा आधी डिसेंबर व आता एप्रिलमध्ये सुरू होणे अपेक्षित आहे. मात्र या मार्गिकेच्या अंतिम चाचणीलाच अद्याप सुरुवात झालेली नसून रूळ जोडणी नसणे, हे त्याचे कारण ठरले आहे. चाचण्यांसाठी आवश्यक असलेले विद्युतीकरणाचे काम, स्थापत्य कामे व रुळ बसविण्याच्या कामाला विलंब झाला असल्याने आरे ते बीकेसी दरम्यान मेट्रो ३ च्या पहिल्या टप्प्याच्या संचालनास विलंब झाला असल्याचे कंपनीने सांगितले.