जेद्दाह : सौदी अरेबियातील जेद्दाह शहरात अमेरिका आणि युक्रेनियन अधिकाऱ्यांमध्ये आठ तास चाललेल्या बैठकीनंतर युक्रेनने युद्धबंदीवर सहमती दर्शवली आहे. अमेरिकेचे राष्ट्राध्यक्ष डोनाल्ड ट्रम्प यांनी युक्रेनच्या या पावलाचे स्वागत केले आहे. यासह, आता ट्रम्प यांनी चेंडू पुतिन यांच्या कोर्टात टाकला आहे.
रशिया आणि युक्रेनमध्ये गेल्या 3 वर्षांहून अधिक काळ सुरू असलेला भयंकर संघर्ष आता संपण्याची आशा दिसत आहे. सौदी अरेबियातील अमेरिकन अधिकाऱ्यांशी झालेल्या चर्चेनंतर युक्रेनने तत्काळ 30 दिवसांच्या युद्धबंदीवर सहमती दर्शवली आहे. आठ तासांच्या चर्चेनंतर, अमेरिकन अधिकाऱ्यांनी हे जाहीर केले आणि सांगितले की, आता चेंडू रशियाच्या कोर्टात आहे. हा प्रस्ताव आता क्रेमलिनसमोर ठेवला जाईल. अमेरिकेचे राष्ट्राध्यक्ष डोनाल्ड ट्रम्प यांनी युक्रेनच्या युद्धबंदी कराराचे स्वागत केले आहे आणि रशियाही त्यावर सहमत होईल अशी आशा व्यक्त केली आहे.
हेही वाचा - Pakistan Train Hijack : 'बलुचिस्तानच्या जन्माची वेळ आलीय..' पाकिस्तानी सैन्याचं मनोबल खचलंय - निवृत्त मेजर जनरल जी. डी. बक्षी
ट्रम्प म्हणाले की, या भयानक युद्धात रशिया आणि युक्रेन दोघांचेही सैनिक मारले जात आहेत आणि युद्धबंदी होणे खूप महत्त्वाचे आहे. मंगळवारी (स्थानिक वेळेनुसार) पत्रकारांशी बोलताना ट्रम्प म्हणाले की, युक्रेनमध्ये काही काळापूर्वीच युद्धबंदीवर सहमती झाली आहे. आता आपल्याला रशियाला जायचे आहे आणि आशा आहे की, राष्ट्राध्यक्ष पुतिन देखील यावर सहमत होतील आणि आपण ते पुढे नेऊ शकू.
…युद्धात मोठी जीवितहानी होईल
'आम्ही आज आणि उद्या रशियन लोकांना भेटणार आहोत आणि आशा आहे की आम्ही एक करार करू शकू, असे वाटते', ट्रम्प यांनी मंगळवारी पत्रकारांना सांगितले. “जर आपण रशियाला यु्द्धबंदी करायला लावू शकलो तर ते खूप चांगले होईल. पण युद्धबंदी लागली नाही तर अनेक लोक मारले जातील”, असंही ट्रम्प म्हणाले.
अमेरिकेसोबतच्या चर्चेत करार झाला
तत्पूर्वी, सौदी अरेबियातील जेद्दाह येथे अमेरिका आणि युक्रेनियन अधिकाऱ्यांमधील बैठकीनंतर, दोन्ही देशांनी एक संयुक्त निवेदन जारी केले ज्यामध्ये म्हटले आहे की युक्रेन अमेरिकेच्या तत्काळ, अंतरिम 30 दिवसांच्या युद्धबंदीच्या प्रस्तावाला तयार आहे, जो दोन्ही पक्षांच्या परस्पर संमतीने वाढवता येईल.
कीवने रशियावर आतापर्यंतचा सर्वात मोठा ड्रोन हल्ला केल्यानंतर एका दिवसात ही घटना घडली आहे. सुमारे 350 ड्रोनने मॉस्कोवर हल्ला केला, ज्यामध्ये 3 लोक ठार आणि 18 जण जखमी झाले. प्रत्युत्तरादाखल, रशियाने युक्रेनच्या ओडेसा शहरावर हल्ला करून प्रत्युत्तर दिले.
आता हा प्रस्ताव रशियासमोर सादर केला जाईल.
सौदी अरेबियातील जेद्दाह येथे झालेल्या बैठकीच्या निकालांबाबत अमेरिका आता रशियाला जाईल. बैठकीनंतर माहिती देताना अमेरिकेचे परराष्ट्र मंत्री मार्को रुबियो म्हणाले, 'आम्ही त्यांना (रशियाला) सांगू की हा विषय चर्चेत आहे. युक्रेन गोळीबार थांबवून वाटाघाटी सुरू करण्यास तयार आहे आणि आता हो किंवा नाही म्हणायचे हे त्यांच्यावर अवलंबून असेल. युद्ध संपवण्याचा एकमेव मार्ग लष्करी तोडगा नसून संवाद आहे, असे त्यांनी सांगितले.
ट्रम्प यांचे विशेष दूत स्टीव्ह विटकॉफ हे येत्या काही दिवसांत पुतिन यांना थेट प्रस्ताव सादर करण्यासाठी मॉस्कोला जाणार असल्याची अपेक्षा आहे, तर, ट्रम्प स्वतः या आठवड्याच्या अखेरीस रशियन राष्ट्राध्यक्षांशी बोलणार आहेत. अमेरिकेचे परराष्ट्र मंत्री मार्को रुबियो यांनी रशियाच्या सहभागाचे महत्त्व अधोरेखित करत म्हटले आहे की जर मॉस्कोने युद्धबंदी नाकारली तर शांततेच्या मार्गात कोण अडथळा आणत आहे हे स्पष्ट होईल.
हेही वाचा - पाकिस्तानात अख्खी ट्रेनच झाली हायजॅक..! बलुचिस्तानच्या स्वातंत्र्याची मागणी करणाऱ्या प्रमुख गटाने स्वीकारली जबाबदारी