Donald Trump iPhone: अॅपलने अलीकडेच त्यांच्या आयफोन युजर्ससाठी एआय फीचर लाँच केले आहेत. पण, यानंतर कंपनीला एका वेगळ्याच समस्येला तोंड द्यावे लागले. अलीकडेच काही युजर्सनी एक्सवर पोस्ट केले आहे की, “आयफोनमधील व्हॉइस-टू-टेक्स्ट फीचरमध्ये जेव्हा कोणी ‘वंशवादी’ म्हटलं की तिथे ‘ट्रम्प’ असे टाइप होऊन येते. हे फक्त काही सेकंदांसाठी घडते. परंतु, त्यानंतर योग्य शब्द दिसू लागतो. व्हायरल झालेल्या टिकटॉक व्हिडिओनंतर हा मुद्दा चर्चेत आला आहे.
स्पीच-टू-टेक्स्ट फीचर वापरून 'वंशवादी' हा शब्द टाइप करण्याचा प्रयत्न केल्यानंतरकाही आयफोन वापरकर्त्यांनी त्यांच्या डिव्हाइसमध्ये 'ट्रम्प' असे ट्रान्सक्रिप्शन (आवाजाचे शब्दात रूपांतर) होत असल्याचे सांगितले. अॅपलने एका आंतरराष्ट्रीय वृत्तसंस्थेलाला सांगितले की, त्यांच्या स्पीच रेकग्निशन टेक्नॉलॉजीमध्ये एक बिघाड झाला आहे, ज्यामुळे वापरकर्ते "r" व्यंजनाने सुरू होणारे शब्द बोलतात तेव्हा "ट्रम्प" हे नाव सुचवत आहे.
हेही वाचा - US Sanctions: ट्रम्प प्रशासनाने 'या' चार भारतीय कंपन्यांवर घातले निर्बंध; इराणी तेल व्यापारात सहभागामुळे केलं लक्ष्य!
आर्टिफिशियल इंटेलिजेंसच्या प्रभावीतेवर प्रश्नचिन्ह
या बगमुळे अॅपलच्या आर्टिफिशियल इंटेलिजेंसच्या प्रभावीतेवर प्रश्नचिन्ह उपस्थित झाले आहे. मात्र, अॅपलच्या सिरी टीममधील माजी कर्मचारी जॉन बर्की, जे आता एआय स्टार्टअप चालवतात, त्यांनी एका वृत्तसंस्थेला सांगितले की, ही चूक कदाचित योगायोगाने घडलेली नसावी. कोणीतरी खोडसाळपणा केल्यासारखे वाटत आहे. यामुळे हा गांभीर्याने घ्यायला हवा. बर्की म्हणाले, 'आता एकच प्रश्न आहे, कोणीतरी हे डेटामध्ये घुसवले का किंवा कोडमध्ये घुसवले का?'
अॅपलच्या सिरी टीमचे माजी सदस्य आणि एआय तज्ज्ञ जॉन बर्की यांना शंका आहे की ही केवळ तांत्रिक चूक नसावी. ते म्हणाले की, 'कोणीतरी तरी हा खोडसाळपणा केल्यासारखे वाटत आहे. यामध्ये मोठा प्रश्न असा आहे की, ही फेरफार डेटामध्ये करण्यात आला होता की, कोडमध्ये काही बदल करण्यात आला होता?'
राष्ट्राध्यक्ष डोनाल्ड ट्रम्प यांच्यावर वंशवादाचे आरोप
दरम्यान, राजकारणात येण्यापूर्वीपासूनच राष्ट्राध्यक्ष डोनाल्ड ट्रम्प यांच्यावर वंशवादाचे आरोप झाले आहेत. शिवाय, स्थलांतरितांविरोधात ट्रम्प यांनी उघडलेल्या मोहिमेमुळे आणि अश्वेतगटाविरुद्ध त्यांच्या काही टिप्पण्यांमुळे या दाव्यांना आणखी चालना दिली गेली आहे. विशेष म्हणजे तरीही 2024 च्या निवडणुकीत ट्रम्प यांनी अश्वेत मतदारांमध्ये त्यांचे आकर्षण वाढविण्यातही यश मिळवले.
पदभार स्वीकारल्यापासून, ट्रम्प यांनी संघीय सरकार आणि खाजगी क्षेत्रातील विविधता, समानता आणि समावेशन प्रयत्नांना पुसून टाकण्यासाठी आक्रमक मोहीम सुरू केली आहे.
याआधीही ट्रम्प आणि अॅपल बगचा संबंध
अमेरिकेचे राष्ट्राध्यक्ष डोनाल्ड ट्रम्प यांच्याशी अॅपल बगचा संबंध येण्याची ही पहिलीच वेळ नाही. ट्रम्प यांच्या अध्यक्षपदाच्या पहिल्या कार्यकाळात, अॅपलच्या व्हॉइस असिस्टंट सिरीने 'डोनाल्ड ट्रम्प कोण आहे?' असे विचारल्यानंतर लिंगाचे छायाचित्र दिसायचे, यानंतर सोशल मीडियावर मोठी खळबळ उडाली होती.
काही युजर्सनी त्यावेळी डोनाल्ड ट्रम्प यांच्या विकिपीडिया पेजवर चुकीची छायाचित्रे अपलोड केली होती. त्यामुळे ही समस्या उद्भवली होती. हा प्रकार समोर आल्यानंतर सिरीने ती माहिती काढून टाकल्याचे वृत्त समोर आले होते.
अ‍ॅपलचे आश्वासन
हा प्रकार समोर आल्यानंत अॅपल कंपनीने नुकतेच असोसिएटेड प्रेसला एक निवेदन दिले आहे. या निवेदनात अॅपलने म्हटले आहे की, “डिक्टेशनला एक्टिव्ह करणाऱ्या स्पीच रेकग्निशन मॉडेलमधील समस्येची आम्हाला माहिती मिळाली आहे आणि आम्ही आता त्यावर उपाय शोधत आहोत.”
दरम्यान, आयफोनमधील या बगमागचे कारण अद्याप अस्पष्ट आहे, परंतु, अॅपलने नमूद केले की, ते दोन शब्दांमधील 'ध्वन्यात्मक ओव्हरलॅप'मुळे (Phonetic overlap) असे घडत असेल. याचबरोबर कंपनीने हा बग लवकरात लवकर दूर करण्याचे आश्वासन दिले आहे.
अ‍ॅपलकडून 20 रोजगार निर्मितीची योजना
या आठवड्याच्या सुरुवातीला, अॅपल कंपनीने पुढील चार वर्षांत अमेरिकेत 500 अब्ज डॉलर्सपेक्षा जास्त गुंतवणूक करण्याची योजना जाहीर केली आहे. याचबरोबर 20 हजार रोजगार निर्मितीही होणार असल्याचे अॅपलने म्हटले आहे.
हेही वाचा - Video Viral: पाकिस्तानी पंतप्रधानांची अजब देहबोली! मूठ आपटून म्हणाले, 'भारताला हरवलं नाही तर माझं नाव शाहबाज शरीफ नाही!'