मेरठ : उत्तर प्रदेशच्या मेरठमध्ये चक्क कबुतरांची चोरी झाल्याचा प्रकार समोर आला आहे. 65 वर्षीय मोहम्मद कय्युम यांच्या घरी असलेली काही अतिशय दुर्मीळ जातीची कबुतरे चोरीला गेली आहेत. मोहम्मद कय्युम यांनी सांगितले की, माझ्या गच्चीवरून दहा लाख रुपये किंमतीची 400 कबुतरे गायब झाली आहेत. रविवारी रात्रीच कबुतरांची चोरी झाली असावी. कय्युम यांच्याकडे काही परदेशी जातीची कबुतरेही होती.

मोहम्मद कय्युम यांच्याकडे असलेली 400 कबुतरे लाकडी पिंजऱ्यांमध्ये घराच्या गच्चीवर ठेवलेली होती. ही कबुतरे कुणीतरी रातोरात चोरून नेली असल्याचे त्यांनी सांगितले. सोमवारी सकाळी जेव्हा कय्युम रोजच्याप्रमाणे गच्चीवर गेले, तेव्हा त्यांना सर्व लाकडी पिंजरे रिकामे दिसले आणि त्यामुळे त्यांना मोठा धक्का बसला. 

हेही वाचा - Crime News : ब्लॅकमेलिंगला कंटाळलेल्या महिलेनं असा काढला त्याचा 'काटा'

मुघल काळापासून खेळला जाणारा ‘कबुतरबाजी’ हा खेळ उत्तर प्रदेशमध्ये चांगलाच प्रसिद्ध आहे. मेरठमधील मोहम्मद कय्युम यांचे कुटुंबीय अनेक पिढ्यांपासून या खेळासाठी कबुतरे पाळत आले आहेत. त्यांच्याकडे विविध रंगांची, विविध जातीची शेकडो कबुतरे होती. घराच्या गच्चीवर अनेक लाकडी पिंजऱ्यांमध्ये ही कबुतरे पाळण्यात आली होती. याच ठिकाणी ते कबुतरांना खायला घालत आणि कबुतरबाजी खेळाचे प्रशिक्षण देत असत. मात्र, आता येथील सर्व कबुतरे चोरीला गेली आहेत.  या कबुतरांची किंमत तब्बल 10 लाख रुपये होती. 

कबुतरबाजी म्हणजे काय?
कबुतरबाजी हा कबुतरांचा खेळ आहे. हा मुघल काळापासून चालत आलेला एक लोकप्रिय खेळ आहे. यामध्ये कबुतरांची शर्यत लावली जाते. शर्यतीसाठी वापरली जाणारी कबुतरे खास जातिवंत असतात. हा एक पारंपरिक खेळ आहे. मोहम्मद कय्युम आणि त्यांचे कुटुंबीय या खेळासाठी कबुतरांना प्रशिक्षण देऊन तयार करत असत. या कबुतरांना घराच्या गच्चीवर ठेवण्यात आले होते आणि तिथेच त्यांना खायला घातले जात असे. याच ठिकाणी त्यांना शर्यतीच्या खेळाचे प्रशिक्षणही दिले जात असे.

कय्युम यांच्या म्हणण्यानुसार, त्यांची कबुतरे परिसरात खूप लोकप्रिय होती. अनेक पक्षी प्रेमी त्यांच्या गच्चीवर कबुतरे पाहण्यासाठी येत असत. कुणालाही न कळता चोरांनी 400 कबुतरे कशी लांबविली असतील, याचेच आम्हाला आश्चर्य वाटत आहे. सोमवारी सकाळी जेव्हा 65 वर्षीय कय्युम रोजच्याप्रमाणे गच्चीवर गेले आणि त्यांना धक्काच बसला. सर्व लाकडी पिंजरे रिकामे होते. त्यांच्या गच्चीवरून 400 कबुतरे गायब झाली होती.

हेही वाचा - पैसे मौजमजेत उडवले, कर्जही झालं; आता बायकोला काय सांगायचं? भिऊन थेट बँकेवर टाकला दरोडा.. असा सापडला चोर

मेरठ शहराचे पोलीस अधीक्षक आयुष विक्रम सिंह म्हणाले की, लिसाडी गेट पोलीस ठाण्यात औपचारिक तक्रार दाखल करून घेण्यात आली आहे. पोलीस या घटनेचा सखोल तपास करत आहेत. सिंह पुढे म्हणाले, मोहम्मद कय्युम यांचे घर ज्या परिसरात आहे, त्याच्या आजूबाजूच्या सर्व सीसीटीव्ही फुटेजची तपासणी केली जात आहे. प्राथमिक अंदाजानुसार, चोर शिडी घेऊन आले असावे. शिडीने गच्चीवर गेल्यानंतर त्यांनी ही कबुतरे पळविली असावीत. याव्यतिरिक्त चोरांनी दुसऱ्या कोणत्याच वस्तूला हात लावलेला नाही.